Fitness Tips : न्यू इयर पार्टीचा आनंद घ्यायचा असेल तर फिट राहण्यासाठी ‘या’ टिप्स करा फॉलो

Health Care : आपण सर्वजण आता २०२३ च्या अखेरच्या टप्प्यात आहोत. अवघ्या २ दिवसांनी आपण नवीन वर्षात पदार्पण करणार आहोत. त्यामुळे, सध्या सर्वत्र नवीन वर्षाच्या पार्टीचा माहोल पहायला मिळतोय. अनेकदा असा आनंद साजरा करताना आपण वेगळ्याच मूडमध्ये असतो, तेव्हा आपल्याला निरोगी लाईफस्टाईलचा विसर पडतो.

या पार्टीच्या माहोलमध्ये आणि आनंदाच्या भरात मग अनहेल्दी फूड खाल्ले जाते. व्हेज-नॉनव्हेजमधील असंख्य पदार्थांसोबतच कोल्डड्रिंक्स, अल्कोहोल अशा अनेक घटकांचा त्यात समावेश होतो. त्यामुळे, तुमचा फिटनेस कमी होण्याची शक्यता असते. जर तुम्हाला या पार्टींचा आनंद घ्यायचा असेल तर, तुम्ही फिट राहणे गरजेचे आहे. त्यासंदर्भातील टिप्स आज आपण जाणून घेऊयात.

भरपूर चाला

फिट राहण्यासाठी चालणे हे अतिशय फायद्याचे आहे. पार्टीला जाण्याच्या काही दिवस आधी तुम्ही शक्यतो वाहन चालवणे टाळायला हवे. त्याऐवजी, तुम्ही चालायला हवे. जास्तवेळ बसूण राहणे टाळा आणि चालायला सुरूवात करा. यामुळे, तुमच्या शरीराची चयापचय क्रिया सुधारेल आणि कॅलरीज देखील बर्न्स होण्यास मदत होईल आणि तुम्ही फिट राहण्यास मदत होईल.

एक्सरसाईज रूटीनमध्ये करा बदल

जर तुम्ही नियमितपणे योगा, विविध प्रकारचे व्यायाम किंवा जिममध्ये वर्कआऊट करत असाल तर ते करत रहा. मात्र, एक्सरसाईज रूटीनमध्ये जरा बदल करा. जर तुम्ही जिममध्ये हेव्ही वर्कआऊट करत असाल तर ते करू नका. त्याचे प्रमाण कमी करा. जास्त प्रमाणात वर्कआऊट किंवा व्यायाम करणे टाळा. त्याऐवजी तुम्ही जेवण झाल्यानंतर ३० मिनिटे चाला.

शरीराला ठेवा हायड्रेटेड

शरीराला हायड्रेटेड ठेवण्यासाठी तुम्ही भरपूर पाणी पिणे आवश्यक आहे. तुमच्या दिवसाची सुरूवात करताना किमान २ ग्लास पाणी प्या. चहा किंवा कॉफी ऐवजी हर्बल चहा पिण्यावर भर द्या. पार्टीच्या दरम्यान, जास्तीत जास्त हेल्दी फूड खाण्याचा प्रयत्न करा. अनहेल्दी फूडचे कमी प्रमाणात सेवन करण्याचा प्रयत्न करा.

नारळ पाणी आणि फळांचा ज्यूस याचा समावेश आहारात करा. पार्टी दरम्यान तुमचे शरीर हायड्रेटेड राहील याची सतत काळजी घ्या. त्यामुळे, पार्टी करताना काही खाण्यापूर्वी २ कप गरम पाणी किंवा ग्रीन टी प्या. पार्टीत मॉकटेल किंवा कॉकटेल प्यायल्यानंतर पाणी अवश्य प्या.