Makar Sankranti 2024 : मकर संक्रांतीला स्नानाचे आणि दानाचे काय आहे महत्व?

Makar Sankranti 2024 : मकर संक्रांतीचा सण अवघ्या काही दिवसांवर येऊन ठेपला आहे. ग्रहांचा राजा सूर्यदेव जेव्हा मकर राशीत प्रवेश करतो, तेव्हा मकर संक्रांतीचा सण साजरा केला जातो, अशी मान्यता आहे. हिंदू धर्माचा हा प्रमुख सण असून या दिवशी सूर्यदेवाची आवर्जून पूजा केली जाते. ही पूजा केल्याने सर्व संकटे दूर होतात आणि घरात सुख-शांती, समृद्धी येते असे मानले जाते.

सूर्याचे उत्तरायण याच दिवसापासून सुरू होते त्यामुळे अनेक भागांमध्ये मकर संक्रांतीला उत्तरायण असे ही म्हटले जाते. या वर्षी मकर संक्रांतीचा सण हा १५ जानेवारीला साजरा केला जाणार आहे. मकर संक्रांतीला स्नानाचे आणि दानाचे देखील खास असे महत्व आहे. काय आहे ते महत्व? याबद्दल आज आपण जाणून घेणार आहोत.

मकर संक्रांतीला स्नान आणि दानाचे महत्व काय?

देशातील अनेक राज्यांमध्ये मकर संक्रांतीच्या दिवशी पवित्र नदीमध्ये स्नान करण्याची परंपरा आहे. हे स्नान केल्यानंतर दान करण्याची देखील परंपरा आहे. या दिवशी गंगा नदीमध्ये स्नान केल्याने आणि दान केल्याने व्यक्तीला पुण्य मिळते आणि संकटे दूर होतात अशी मान्यता आहे.

तसेच, मागच्या जन्मातील वाईट कर्मांपासून देखील मुक्ती मिळते आणि जीवन सुखी होते, असे मानले जाते. त्यामुळे, मकर संक्रांतीच्या दिवशी स्नान आणि दान करण्याचे हे खास असे महत्व आहे. यासोबतच, या दिवशी गंगा नदीत स्नान केल्याने १० अश्वमेध यज्ञ आणि १००० गाईंचे दान करण्यासारखे पुण्य मिळते, अशी देखील मान्यता आहे.

'या' गोष्टींचे दान करणे असते शुभ

मकर संक्रांतीच्या दिवशी पवित्र नदीमध्ये स्नान केल्यानंतर दान करण्याची परंपरा आहे. या दिवशी शुभ मुहूर्तावर चपल्ल, तीळ, गूळ, ऊबदार कपडे आणि ब्लॅंकेट दान केल्याने शनिदेवाची आणि सूर्यदेवतेची कृपा होते, अशी मान्यता आहे.

जर तुम्हाला पवित्र नदीमध्ये स्नान करणे शक्य नसल्यास तुम्ही तुमच्या अंघोळीच्या पाण्यात तीळ आणि गंगाजल मिसळून घरी स्नान करावे. यानंतर, वरील गोष्टींचे दान करा.