गरोदरपणात स्त्रियांना डोहाळे का लागतात माहित आहे?

आई होणं हा प्रत्येक स्त्रीच्या आयुष्यातला अविस्मरणीय क्षण असतो. एखादी स्त्री आई होणार समजल्यावर घरातलं वातावरण अगदी बदलून जातं. सगळीकडे आनंद, उत्साहाचं वातावरण असतं. घरातील प्रत्येक सदस्य गरोदर स्त्रीच्या दिमतीला तयार असतो. तिला काय हवं नको याची पुरेपूर काळजी घेतली जाते. त्यातच जर स्त्रीला डोहाळे लागले असतील तर विचारायलाच नको. रात्री अपरात्रीदेखील स्त्रियांना कोणताही ठराविक पदार्थ खाण्याची इच्छा होते. परंतु, हे डोहाळे नेमके का लागतात किंवा डोहाळे म्हणजे नेमकं काय ते आज जाणून घेऊयात.

साधारणपणे अनेक स्त्रियांनी गरोदरपणात चटपटीत पदार्थ किंवा माती, खडू असे पदार्थ खावेसे वाटतात. त्यामुळे कदाचित बाळाला किंवा आईला हे पदार्थ खाण्याची इच्छा होत असेल असा एक सर्व सामान्य समज आहे. परंतु, प्रत्यक्षात डोहाळे लागण्यामागे एक कारण आहे. ठराविक पदार्थ खाण्याची इच्छा होणे म्हणजे शरीरात एखाद्या घटकाची कमतरता असणे असं या मागचं खरं कारण आहे.

हेही वाचा : सावधान! आठ पदार्थांमुळे कोरोनाचा धोका; इम्युनिटीवर करतात परिणाम

गरोदरपणात स्त्रियांच्या हार्मोन्समध्ये बदल होत असतो. त्यामुळे शरीरातील या हार्मोनल बदलामुळे स्त्रियांना डोहाळे लागतात. त्यातच शरीरात एखादा विशिष्ट पोषकद्रव्य कमी झाल्यासदेखील स्त्रियांना ते पदार्थ खावेसे वाटतात.उदा. स्त्रियांना माती किंवा खडू खावासा वाटात असेल तर, त्या स्त्रीमध्ये कॅल्शिअमची कमतरता आहे असं दिसून येतं.

विशेष म्हणजे, प्रत्येक प्रांत आणि ठिकाणानुसार, स्त्रियांचे डोहाळे वेगवेगळे असतात. भारतीय स्त्रियांना आंबट, गोड पदार्थ खाण्याची इच्छा होते. तर, जपान, द. कोरिया या सारख्या ठिकाणच्या स्त्रियांना भातापासून तयार केलेले पदार्थ खावेसे वाटतात.