Loksabha Election : अमेठी, रायबरेलीकडे मोदींची पाठ;अमित शहांचे रोड शो आणि सभा,उद्याच्या मतदानाकडे लक्ष

नवी दिल्ली : देशातील रायबरेली आणि अमेठी या लक्षवेधी मतदारसंघात यावेळी पंतप्रधान नरेंद्र मोदी यांनी प्रचारसभा घेतल्या नाहीत. गृहमंत्री अमित शहा यांनी या दोन्ही मतदारसंघात रोड शो व सभा घेतल्या. दरम्यान, पंतप्रधान नरेंद्र मोदी यांनी आज हरियानातील अंबाला येथे सभा घेतली.

रायबरेली व अमेठी मतदारसंघांमध्ये प्रचार आज संपला. परंतु या प्रचाराच्या दोन आठवड्यात पंतप्रधानांनी या मतदारसंघात सभा किंवा रोड शो केले नाही. भाजपचे स्टारप्रचारक पंतप्रधान नरेंद्र मोदी यांनी देशात सर्वाधिक प्रचारसभा व रोड शो केले आहेत. गांधी कुटुंबाचे मतदारसंघ राहिलेल्या रायबरेली व अमेठीमध्ये मात्र त्यांनी यावेळी जाणे टाळले.

रायबरेलीमध्ये काँग्रेस नेते राहुल गांधी मैदानात आहेत तर अमेठीत गांधी कुटुंबाचे विश्वासू किशोरीलाल शर्मा लढत देत आहेत. या मतदारसंघातील प्रचाराची धुरा काँग्रेसच्या सरचिटणीस प्रियांका गांधी यांनी सांभाळली. गेल्या निवडणुकीत मोदी यांनी अमेठीत प्रचार केला होता. परंतु यावेळी दोन्ही लक्षवेधी मतदारसंघात ते आले नाहीत. या मतदारसंघातील प्रचाराची जबाबदारी गृहमंत्री अमित शहा यांच्यावर सोपविली होती. दोन दिवसांपूर्वीच शहा यांनी रायबरेलीत राहुल यांच्यावर टीकास्त्र सोडले होते.