शरद पवारांचा निपाणीतील 'हुकमी एक्का' कोणाला साथ देणार? जोल्ले की जारकीहोळी? दोन दिवसांत निर्णयाची शक्यता

निपाणी : गेल्या विधानसभा निवडणुकीत आपण स्वतंत्रपणे लढलो होतो. लोकसभा निवडणुकीच्या पार्श्वभूमीवर काँग्रेस (Congress) व भाजपच्या वरिष्ठ नेतेमंडळींकडून आपणाशी संपर्क साधला जात आहे. निवडणुकीत मदत करण्याची मागणी होत आहे, मात्र आपण निर्णय न देता कार्यकर्त्यांचा मेळावा घेऊन त्यात मते जाणून त्यानुसार निर्णय घेणार असल्याचे राष्ट्रवादी काँग्रेस पक्षाचे नेते उत्तम पाटील (Uttam Patil) यांनी सांगित

शुक्रवारी (ता. ५) रात्री स्तवनिधी येथील कार्यकर्त्यांच्या मेळाव्यानंतर बैठकीत ते बोलत होते‌. श्री. पाटील म्हणाले, कार्यकर्त्यांनी अनेक गोष्टींचा उहापोह केला आहे. कार्यकर्त्यांना सन्मानाची वागणूक गरजेची आहे. या सर्व विषयांवर पालकमंत्री सतीश जारकीहोळी (Satish Jarkiholi) यांच्यासमोर केली जाणार आहे. त्यानंतर राष्ट्रवादीचे नेते शरद पवार (Sharad Pawar) यांच्याशी भेट घेऊन पुढील काही दिवसांत कार्यकर्त्यांचा मेळावा घेऊन योग्य ती भूमिका घेतली जाईल.

यावेळी माजी आमदार सुभाष जोशी म्हणाले, राष्ट्रवादी पक्ष (शरद पवार गट) हा इंडिया आघाडीतील महत्त्वाचा भागीदार आहे. देशात ज्या पद्धतीने इंडिया आघाडीने काँग्रेसला पाठिंबा दिला आहे. त्याप्रमाणे राष्ट्रवादी काँग्रेसनेही काँग्रेस उमेदवार प्रियंका जारकीहोळी (Congress candidate Priyanka Jarkiholi) यांना पाठिंबा द्यावा, असा बहुतेक कार्यकर्त्यांचा सूर आहे.

त्यामुळे उत्तम पाटील यांच्याबरोबर सविस्तर चर्चा करून जाहीर सभा घेऊन राष्ट्रवादी काँग्रेस कार्यकर्त्यांची भूमिका स्पष्ट करतील. यावेळी अशोककुमार असोदे, गोपाळ नाईक, राजू पाटील, दिलीप पठाडे, दत्ता नाईक, शौकत मनेर, विशाल गिरी, संजय पावले, बाळासाहेब सूर्यवंशी, इम्रान मकानदार, शिरीष कमते आदी उपस्थित होते.