CM Arvind Kejriwal : केजरीवाल सरकारचं काम कोठडीतूनही सुरु; मुख्यमंत्र्यांनी दिले 'हे' आदेश

Arvind Kejriwal Arrest Updates : अबकारी कर गैरव्यवहार प्रकरणात गंभीर आरोप झाल्यानंतर ईडीच्या कोठडीत असलेले दिल्लीचे मुख्यमंत्री अरविंद केजरीवाल यांनी रविवारी कोठडीतून पहिला आदेश जारी केला. केजरीवाल कोठडीतूनच सरकार चालवतील, असे आम आदमी पक्षाने याआधी स्पष्ट केले होते.

दिल्लीच्या काही भागात पाण्याची समस्या निर्माण झाली आहे, त्यावर तोडगा काढावा, असे आदेश केजरीवाल यांनी पाणीपुरवठा मंत्री आतिशी यांना दिले. यावर आतिशी यांनी पत्रकार परिषद आयोजित करत केजरीवाल यांना अटक झाली असली तरी दिल्लीकरांचे कोणतेही काम अडणार नाही, अशी प्रतिक्रिया दिली. केजरीवाल यांनी दिल्लीच्या लोकांचे हित लक्षात घेऊन आदेश दिला. हा आदेश पाहिल्यानंतर माझ्या डोळ्यात अश्रू आले, असेही त्या म्हणाल्या.

पाणी आणि स्वच्छतेसारख्या छोट्या-छोट्या गोष्टींबाबत कोणता मुख्यमंत्री विचार करू शकतो, असे सांगून आतिशी पुढे म्हणाल्या की, मुख्यमंत्री केजरीवाल हे दोन कोटी दिल्लीकर लोकांना आपले कुटुंब मानतात. दिल्लीकरांसाठी केजरीवाल हे केवळ एक मुख्यमंत्री नाहीत तर ते त्यांच्या कुटुंबाचे सदस्य आहेत. दरम्यान केजरीवाल यांच्या अटकेनंतर निर्माण झालेल्या स्थितीवर चर्चा करण्यासाठी आप नेत्यांनी एका उच्चस्तरीय बैठकीचे आयोजन केले होते. पक्षाचे सचिव संदीप पाठक यांच्या अध्यक्षतेखाली ही बैठक झाली.

अबकारी कर प्रकरणातला आरोपी शरदचंद्र रेड्डी याला तपास संस्थांनी अटक केली. त्यानंतर त्याच्याकडून रोख्यांच्या माध्यमातून 60 कोटी रुपये घेण्यात आले. नंतर हाच आरोपी माफीचा साक्षीदार बनला, असा आरोप आप नेते सौरभ भारद्वाज यांनी पत्रकारांशी बोलताना केला. दरम्यान आम आदमी पक्षाकडून भाजपविरोधात तर भाजप कार्यकर्त्यांकडून मुख्यमंत्री केजरीवाल यांच्याविरोधात आजही आंदोलन करण्यात आले. गैरव्यवहार प्रकरणात अटक झाल्यानंतर केजरीवाल यांनी मुख्यमंत्री पदाचा राजीनामा द्यावा, अशी मागणी भाजप करीत आहे.