'शरद पवारांनी भाजपला पाठिंबा दिला होता, ती जर सुपारी होती तर आमचीही..'; आव्हाड, राऊतांच्या टीकेला मनसे आमदाराचं प्रत्युत्तर

डोंबिवली : राष्ट्रवादीचे आमदार जितेंद्र आव्हाड (Jitendra Awhad) यांनी मनसे अध्यक्ष राज ठाकरे (Raj Thackeray) यांच्यावर टीका करताना त्यांना कोणी सुपारी दिलीये का बघा असे आरोप केले आहेत. याला मनसेचे आमदार राजू पाटील (Raju Patil) यांनी उत्तर दिले असून 2014 ला भाजपाचे जेव्हा 126 आमदार आले, तेव्हा शरद पवार यांनी बिनशर्थ पाठिंबा दिला होता. ती जर सुपारी होती तर होय आमची ही सुपारी आहे असे बोल लगावले आहेत.

कल्याण लोकसभा मतदारसंघात (Kalyan Lok Sabha Constituency) मतदान प्रक्रिया पार पडली आहे. कल्याण ग्रामीण विधानसभेचे आमदार राजू पाटील यांनी ग्रामीण विधानसभा क्षेत्रातील मतदान केंद्रावर भेट देत आढावा घेतला. यावेळी पत्रकारांनी जितेंद्र आव्हाड आणि संजय राऊत यांनी राज ठाकरे यांच्यावर जी टीका केली, त्यावर प्रश्न विचारला असता मनसे आमदार पाटील यांनी आमदार जितेंद्र आव्हाड आणि खासदार संजय राऊत (Sanjay Raut) यांना जशातसे उत्तर दिले आहे.

आव्हाड म्हणाले, राज ठाकरेंनी भाजपची सुपारी घेतली!

यावर मनसे आमदार पाटील म्हणाले, 2014 ला शरद पवार यांनी जेव्हा युती तुटली होती, तेव्हा बीजेपीचे 126 आमदार आले होते. त्यावेळेस न मागता बिनशर्त पाठिंबा दिला होता. ती जर सुपारी असेल तर होय ही आम्ही सुपारी घेतली असे आमदार म्हणाले.

शिवसेना ठाकरे गटाचे नेते संजय राऊत यांनी राज ठाकरे यांच्यावर टीका करताना म्हणाले होते की, राज ठाकरेनी जेवढी मेहनत भाजपसाठी केली, तेवढी मेहनत स्वतःच्या पक्षासाठी केली असती तर...यावर मनसे आमदार पाटील म्हणाले, ते आमचं आम्ही बघू. त्यांनी चिंता करायची गरज नाही. ४ तारखेनंतर त्यांनी स्वतःची चिंता करावी.