Loksabha Election 2024 : उमेदवारीवरून भाजप-तृणमूलमध्ये असंतोष ; उत्तर बंगालमध्ये भाजपला बसू शकतो राजकीय फटका

कोलकत्ता : लोकसभा निवडणुकीसाठी पश्चिम बंगालमध्ये सत्ताधारी तृणमूल काँग्रेसमध्ये असंतोष वाढत असून, पश्चिम बंगालमधील भाजप आणि तृणमूल काँग्रेसच्या गटांमध्ये दिवसेंदिवस असंतोष वाढत आहे. ‘टीएमसी’ने सात विद्यमान खासदारांना उमेदवारी नाकारली आहे. दोन्ही पक्षांतील अनेक नेत्यांनी आगामी लोकसभा निवडणुकीसाठी उमेदवारांच्या निवडीबद्दल नाराजी व्यक्त केली आहे. तिकिटासाठी इच्छुक असलेल्या अनेक ‘टीएमसी’ नेत्यांनी उघडपणे त्यांच्याकडे लक्ष दिलेल्या जागांसाठी उमेदवारी न मिळाल्याबद्दल नाराजी व्यक्त केली आहे. उमेदवार निवडीवरून भाजपच्या काही प्रभावशाली नेत्यांमध्ये असाच असंतोष दिसून आला आहे. जातीय गतिशीलतेमुळे उत्तर बंगालमध्ये भाजपसाठी चिंतेचे कारण बनू शकते.

मुख्यमंत्री ममता बॅनर्जी यांचे धाकटे बंधू बाबून बॅनर्जी यांनी हावडा जागेसाठी उमेदवारी न मिळाल्याने उघडपणे नाराजी व्यक्त करीत बंडाचा झेंडा हाती घेतला आहे. येथे ‘टीएमसी’ने विद्यमान खासदार प्रसून बॅनर्जी यांना तिकीट दिले आहे. राज्यसभेच्या खासदार मौसम बेनझीर नूर आणि पक्षाचे प्रवक्ते संतनू सेन यांच्यासह किमान पाच वरिष्ठ ‘टीएमसी’ नेत्यांनी अनुक्रमे मालदा उत्तर आणि दम दम जागांवरून उमेदवारी मागितली होती. मात्र त्यांना तिकीट नाकारण्यात आले आहे. बराकपूरचे भाजपचे खासदार अर्जुनसिंग यांनी दोन वर्षांपूर्वी ‘टीएमसी’मध्ये प्रवेश केला होता. तिकीट नाकारल्यानंतर ते मूळ पक्षात परतले. ‘टीएमसी’चे चारवेळा आमदार आणि कोलकता उत्तरसाठी इच्छुक असलेले तपस रॉय यांनी उमेदवारी न मिळाल्याने भाजपमध्ये प्रवेश केला आहे. त्यांच्या जागी पाचवेळा खासदार राहिलेल्या सुदीप बंदोपाध्याय यांनाच पुन्हा उमेदवारी दिली आहे.

आतापर्यंत ४२ पैकी १९ जागांसाठी उमेदवार जाहीर करणाऱ्या भाजपलाही अनुसूचित जमाती आणि राजबंशी समाजावर लक्षणीय प्रभाव असलेले केंद्रीय मंत्री आणि अलिपूरद्वारचे खासदार जॉन बार्ला आणि राज्यसभेचे खासदार अनंता महाराज यांच्यामुळे लाजीरवाण्या प्रसंगांना सामोरे जावे लागले आहे. उत्तर बंगालमधील काही जागांवर उमेदवारांच्या निवडीबद्दल नाराजी व्यक्त केली. श्री. बरला यांच्या जागी पक्षाचे विधानसभेचे मुख्य व्हीप मनोज तिग्गा यांची अलिपूरद्वारसाठी नियुक्ती करण्यात आली. भाजपने कूचबिहारमध्ये केंद्रीय मंत्री निसिथ प्रामणिक यांना पुन्हा उमेदवारी दिली आहे. ग्रेटर कूचबिहार राज्य चळवळीतील प्रमुख व्यक्ती श्री. महाराज यांनी त्यांच्या उमेदवारीला विरोध केला आहे.

टीएमसी’ने २३ पैकी १६ विद्यमान खासदारांना पुन्हा उमेदवारी दिली आहे, तर सात खासदारांना उमेदवारी नाकारली आहे. वर्धमान पूर्वा येथील दोनवेळा खासदार असलेले सुनील मोंडल, जे २०२१ च्या विधानसभा निवडणुकीपूर्वी भाजपमध्ये सहभागी झाले होते, त्यांनाही वगळण्यात आले आहे. या जागेसाठी एका राजकीय नवख्या व्यक्तीला उमेदवारी देण्यात आली. अर्जुनसिंग आणि सुनील मोंडल यांच्या पक्षबदलाच्या भूमिकेमुळे त्यांना उमेदवारी देऊ का? ते आमच्या तिकिटावर जिंकल्यानंतर पुन्हा आमचा विश्वासघात करतील? त्यांना उमेदवारी न देण्याचा पक्षाचा जाणीवपूर्वक निर्णय होता, असे ‘टीएमसी’तर्फे सांगण्यात आले. काँग्रेसचे दिग्गज नेते एबीए गनीखान चौधरी यांच्या कुटुंबातील वंशज आणि ‘टीएमसी’च्या राज्यसभा खासदार मौसम बेनझीर नूर यांनी पक्षाच्या उमेदवारीसाठी दुर्लक्ष केल्याबद्दल नाराजी व्यक्त केली.

भाजपमध्येही मोठे नाराजीनाट्य

राज्यात ३५ हून अधिक जागा जिंकण्याचे लक्ष्य ठेवणाऱ्या भाजपनेही श्री. महाराज आणि श्री. बरला यांना शांत करण्याचा प्रयत्न केला आहे. ग्रेटर कूचबिहार पीपल्स असोसिएशनच्या एका गटाचे प्रमुख असलेले महाराज, राजबंशी समुदायावर प्रभुत्व मिळवतात. ते या प्रदेशातील सुमारे तीस टक्के मतदार आहेत. गेल्या वर्षी राज्यसभेच्या निवडणुकीत भाजपने त्यांना उमेदवारी देऊ केली होती आणि ते सहज जिंकले. श्री. बरला यांनी २०२१ मध्ये उत्तर बंगालसाठी केंद्रशासित प्रदेशाची मागणी केल्यानंतर लक्ष वेधले होते.

ते अलिपूरद्वारमधील एसटी आणि चहा बाग कामगारांचे लोकप्रिय नेते आहेत. २०१९ मध्ये श्री. बरला यांनी अलिपूरद्वार आणि लगतच्या जलपाईगुडी या दोन्ही जागांवर भाजपला विजय मिळवून देण्यात महत्त्वाची भूमिका बजावली होती. २०१९ मध्ये भाजपला १८ जागा मिळाल्या होत्या, त्यापैकी सात जागा उत्तर बंगालमधील होत्या. दरम्यान, ‘पक्षाने त्यांच्याशी आधीच बोलणी केली आहे. अपेक्षा पूर्ण न झाल्यास नाराजी व्यक्त होणे स्वाभाविक आहे, पक्ष एकसंध आहे, असे भाजपचे प्रदेशाध्यक्ष सुकांता मजुमदार यांनी सांगितले.