छत्रपती संभाजीनगर : ‘‘निवडणुकी आल्या की, काँग्रेसचे नेते पाकिस्तानची भाषा बोलू लागतात. भाकरी खायची भारताची आणि चाकरी करायची पाकिस्तानची अशा देशद्रोही काँग्रेसला निवडणुकीत हद्दपार करा’’, असा हल्लाबोल मुख्यमंत्री एकनाथ शिंदे यांनी शुक्रवारी (ता. दहा) केला.
लोकसभेच्या छत्रपती संभाजीनगर (औरंगाबाद) मतदारसंघातील महायुतीचे उमेदवार संदीपान भुमरे यांच्या प्रचारासाठी पार पडलेल्या गटप्रमुखांच्या मेळाव्यात मुख्यमंत्री बोलत होते. यावेळी केंद्रीय अर्थराज्य मंत्री डॉ. भागवत कराड, भुमरे, नीलम गोऱ्हे, अतुल सावे, संजय शिरसाट, शीतल म्हात्रे, प्रदीप जैस्वाल, अर्जुन खोतकर, शिरीष बोराळकर, राजेंद्र जंजाळ आदींची उपस्थिती होती.
मुख्यमंत्री शिंदे म्हणाले, ‘‘काँग्रेसच्या ६० वर्षांच्या काळात जे झाले नाही ते मागील १० वर्षांत पूर्ण झाले. देशाचा विकास, प्रगती मोदींच्या कार्यकाळात झाली. वर्ष २०१४ आधी बॉम्बस्फोट, घोटाळे व्हायचे. २०१४ नंतर बॉम्बस्फोट झाले का? पंतप्रधानांवर कुठलाही डाग नाही. २०१४ आधी यांनी किती घोटाळे केलेत. आज देशात १० वर्षांत आणि राज्यात २ वर्षांत काम झाली आहेत. पाकिस्तानचे कंबरडे मोडणारे पंतप्रधान नरेंद्र मोदी आहेत. विरोधकांकडे पाकिस्तानची तळी उचलणारे आहेत. आपल्याकडे गरीब कल्याणाचा झेंडा आहे तिकडे बेइमानीचा झेंडा आहे’’, अशी टीकाही मुख्यमंत्र्यांनी विरोधकांवर केली.
खैरेंचा सध्या खैरोद्दीन
भुमरे म्हणाले, ‘‘निवडणुकीचा अर्ज भरताना चंद्रकांत खैरेंना प्रश्न पडला होता, फॉर्मवर औरंगाबाद लिहायचे की छत्रपती संभाजीनगर? खैरेंचा सध्या खैरोद्दीन झाला. मुस्लिमांना नमाज पडण्याची भाषा ते बोलत आहे. त्यामुळे खैरेंच हिंदुत्व म्हणजे नौटंकी आहे.’’ दरम्यान, भुमरे यांनी मुंबई ते गुवाहाटी प्रवासातील किस्से, गमतीजमती सांगून सर्वांनाच पोट धरून हसायला भाग पाडले.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
