Nashik Loksabha Constituency : खासदार हेमंत गोडसे ‘वर्षा’वर तळ ठोकून

मुंबई : नाशिक मतदारसंघातील महायुतीच्या उमेदवारीचा तिढा वाढतच चालला आहे. मुख्यमंत्री एकनाथ शिंदे  यांनी काल आठ उमेदवारांची पहिली यादी जाहीर केली. मात्र, अपेक्षित असूनही हेमंत गोडसे यांचे नाव त्या यादीत नव्हते.

याबाबत भारतीय जनता पक्ष आणि एकनाथ शिंदे गटात तीव्र रस्सीखेच सुरू आहे. त्यामुळेच नाशिकचे विद्यमान खासदार हेमंत गोडसे यांनी ‘वर्षा’वर तळ ठोकताना उमेदवारी नक्की करण्यासाठी जोराचा प्रयत्न करत असल्याचे समजते. या जागेबाबत गोडसे व मुख्यमंत्री एकनाथ शिंदे यांची चर्चा झाल्याचेही समजते.

गोडसेंनी मात्र आपल्यालाच उमेदवारी मिळणार असल्याचा व त्या दृष्टीने सकारात्मक चर्चा सुरू असल्याचेही म्हटले आहे. याच जागेवरून अजित पवार गटाचे अन्न व नागरी पुरवठा मंत्री छगन भुजबळ  यांचेही नाव चर्चेत आले आहे. त्यामुळे गोडसे यांच्या उमेदवारीचा हा गुंता वाढतच चालला आहे.

पहिल्या यादीत विद्यमान खासदार गोडसे यांचे नाव नसल्याने कार्यकर्ते संतप्त झाले आहे. शिंदे गटाचे मंत्री दादा भुसे व इतरांनी या जागेवरील शिंदे गटाच्या दाव्याबाबत मुख्यमंत्र्यांची भेटही घेतली होती. मात्र मध्येच राष्ट्रवादीच्या अजि पवार गटाच्या वतीने मंत्री छगन भुजबळ यांचे नाव पुढे आल्याने शिंदे गट अस्वस्थ झाला आहे.