सनदी अधिकाऱ्यांसाठी मुख्यमंत्र्यांची भेट दुर्लभ!

मुंबई: देवेंद्र फडणवीस यांच्या कार्यकाळात महत्त्वाची पदे उपभोगल्यावर सुमारे डझनभर ज्येष्ठ आयएएस अधिकाऱ्यांनी मुख्यमंत्री उद्धव ठाकरे यांचा पुन्हा पूर्ण ताबा घेतला आहे. मुख्यमंत्र्यांना भेटण्यात वरिष्ठ अधिकाऱ्यांची आडकाठी होत आहे.

दिलेला शब्द पाळा, दगा देऊ नका, या माजी मंत्र्याचा भाजपाला टोला

अन्य कोणी अधिकारी ठाकरे यांना भेटण्यासाठी येणार असेल, तर त्यापूर्वीच यातील एक अतिवरिष्ठ अधिकारी मुख्यमंत्र्यांच्या दालनात जाऊन काही विषयांवरील चर्चा करत वेळ मारून नेत असल्याने भेटावयास गेलेला अधिकारी हात हलवत माघारी फिरत असल्याची माहिती ज्येष्ठ आयएएस अधिकाऱ्याने दिली.

हे वाचलंत का - ठाण्यात मद्यपी कॅमेऱ्यांच्या रडारवर

राज्याचा गाडा आपल्या इच्छेनुसार आणि तांत्रिक बाबींच्या माहितीच्या आधारे हाकता यावा, अशी मुख्यमंत्र्यांची अपेक्षा असते. याच धर्तीवर सन २०१४ मध्ये सत्तेवर आल्यानंतर देवेंद्र फडणवीस यांनी आपल्या मर्जीतील अनेक अधिकाऱ्यांची महत्त्वाच्या पदांवर नियुक्‍ती केली. यात मुख्य सचिवांपासून मुख्यमंत्री कार्यालयातील अपरमुख्य सचिव, प्रधान सचिव आणि मंत्रालयातील अन्य प्रधान सचिव, मुंबई आणि ठाणे महापालिका आयुक्‍त, नगरविकास विभाग - २, महसूल, वित्त विभाग, गृह, सामान्य प्रशासन, एमएमआरडीए, म्हाडा, गृहनिर्माण, राज्य रस्ते विकास महामंडळ, मुंबई, मुंबई उपनगर तसेच पुणे, नाशिक, नागपूरसारख्या मोठ्या शहरांचे पालिका आयुक्‍त अशा नियुक्‍त्या फडणवीस यांनी केल्या होत्या. विशेष म्हणजे जी पदे आयएएस अधिकाऱ्यांची आहेत, अशा पदांवरही फडणवीस यांनी आयपीएस आणि केंद्रीय महसूल सेवेतील अधिकाऱ्यांची वर्णी लावली आहे.

हेही वाचा - ऐरोली कळवा उन्नत मार्गात ठरतोय हा अडथळा

आता राज्यात सत्तांतर झाल्यानंतर शिवसेनेचे उद्धव ठाकरे मुख्यमंत्री पदावर विराजमान झाले. त्यामुळे मंत्रालयासह राज्यातील महत्त्वाच्या पदांवरील अधिकाऱ्यांच्या बदल्या अपेक्षित असताना याच अधिकाऱ्यांनी ठाकरे यांचा  ताबा घेतल्याने बदल्या रखडल्याचे समजते.

‘आधीचे मुख्यमंत्री आपणांस योग्य पोस्टिंग देत नव्हते. मनासारखे काम करू देत नव्हते’, अशी कारणे सांगून हे अधिकारी उद्धव ठाकरे यांचा विश्‍वास संपादन करत आहेत. या अधिकाऱ्यांनी जोरदार लॉबिंग केल्याने अन्य ज्येष्ठ अधिकाऱ्यांची मुख्यमंत्र्यांसोबतची भेट दुरापास्त झाल्याचे सांगण्यात आले.

महत्वाचं - तरुणाईचे समाजमाध्यमावर सोशल वार

 एखाद्या सचिव दर्जाच्या अधिकाऱ्याला मुख्यमंत्र्यांची भेट घ्यावयाची असल्यास त्यांना मुख्यमंत्री कार्यालयाला कळवावे लागते. हे अधिकारी येणार असल्ल्याचे समजताच काही अधिकारी मुख्यमंत्र्यांच्या दालनात जाऊन बसत असल्याचे एका अधिकाऱ्याने सांगितले आहे.

वेळ मारून नेण्याचे प्रयत्न
जेव्हा एखाद्या अधिकाऱ्याला मुख्यमंत्र्यांची भेट घ्यायची असते, नेमके त्याच वेळी या ठरावीक अधिकाऱ्यांपैकी एखादा अधिकारी आपल्याकडील एखादी फाइल घेऊन मुख्यमंत्र्यांशी चर्चा करण्यासाठी जातात आणि त्या ठिकाणी वेळ लावतात. त्यामुळे वेळ घेऊन भेटायला आलेला अधिकारी वाट पाहून भेट न घेताच परतल्याचे एका अधिकाऱ्याने सांगितले.