Ashadhi Wari साठी मध्य रेल्वेकडून मोठी घोषणा; वारकरी, भाविकांसाठी धावणार 'इतक्या' विशेष गाड्या

सोलापूर : मध्य रेल्वेच्या वतीने आषाढीसाठी (Ashadhi Wari 2023) महाराष्ट्राच्या प्रत्येक भागातून व इतर राज्यांतून लाखोंच्या संख्येने येणाऱ्या वारकरी व भाविकांसाठी एकूण ८२ विशेष गाड्या धावणार आहेत. नियमित धावणाऱ्या गाड्यांसह एकूण १८१ गाड्या या कालावधीत धावतील.

यामध्ये नागपूर- मिरज विशेष रेल्वे गाडीच्या २५ आणि २८ जूनला चार फेऱ्या होतील. नागपूर- पंढरपूर विशेष रेल्वे गाडी आणि अमरावती- पंढरपूर विशेष रेल्वे गाडीच्या २६ आणि २९ जूनला चार फेऱ्या होतील, खामगाव- पंढरपूर विशेष रेल्वे गाडी आणि भुसावळ- पंढरपूर विशेष रेल्वे गाडीच्या २६ आणि २९ जूनला चार फेऱ्या होतील.

लातूर- पंढरपूर- लातूर विशेष रेल्वे गाडीच्या २६ ते ३० जूनपर्यंत आठ फेऱ्या होतील, मिरज- पंढरपूर- मिरज विशेष रेल्वे गाडीच्या २४ जून ते ३ जुलै दरम्यान आणि मिरज - कुर्डुवाडी - मिरज विशेष रेल्वे गाडीच्या २० फेऱ्या होतील.

पंढरपूर -मिरज -पंढरपूर या विशेष रेल्वे गाडीच्या २४ जून ते ३ जुलै दरम्यान दहा फेऱ्या होणार आहेत. जालना - पंढरपूर, पंढरपूर - नांदेड, औरंगाबाद - पंढरपूर, पंढरपूर - औरंगाबाद या विशेष रेल्वेच्या २८ व २९ जून अशा दोन फेऱ्या होणार आहेत. आदिलाबाद- पंढरपूर- आदिलाबाद विशेष रेल्वे गाडीच्या २८ जून आणि २९ जून अशा दोन फेऱ्या होतील.