Aarakshan Bachav Janyatra: वंचित काढणार 'आरक्षण बचाव जनयात्रा'; प्रकाश आंबेडकरांनी केली मोठी घोषणा

मुंबई : राज्यात सध्या मराठा आणि ओबीसी समाजात आरक्षणावरुन संघर्ष पेटलेला असताना त्यावर अद्याप तोडगा निघू शकलेला नाही. दरम्यान, वंचित बहुजन आघाडीचे अध्यक्ष प्रकाश आंबेडकर यांनी 'आरक्षण बचाव जनयात्रे'ची घोषणा केली आहे. त्यानुसार, १३ जिल्ह्यांमधून ही यात्रा जाणार असून छत्रपती संभाजीनगर इथं या यात्रेची सांगता होणार आहे. पत्रकार परिषदेत प्रकाश आंबेडकर यांनी याची माहिती दिली.

आंबेडकर म्हणाले, राजर्षी शाहू महाराज यांनी २६ जुलै रोजी सामाजिक आरक्षणाला सुरुवात केली होती. त्याअनुषंगानं शाहू महाराजांना स्मरण करुन येत्या २६ जुलै रोजी पासून वंचित बहुजन आघाडीकडून एससी-एसटी, ओबीसी यांच्या आरक्षण बचावची हक्काची लढाई आम्ही सुरु करणार आहोत. मुंबईतल्या चैत्यभूमीवरुन या 'आरक्षण बचाव जनयात्रे'ला सुरुवात होणार आहे.

'या' जिल्ह्यांतून निघणार यात्रा

कोल्हापूर, सांगली, सोलापूर, उस्मानाबाद, बीड, लातूर, नांदेड, यवतमाळ, अमरावती, अकोला, बुलढाणा, वाशिम, जालना अशी ही यात्रा मार्गक्रमण करणार आहे. या यात्रेची सांगता ७ किंवा ८ ऑगस्टला औरंगाबादमध्ये होईल, असंही यावेळी आंबेडकर यांनी सांगितलं.

कसा असणार कार्यक्रम?

यात्रेवेळी ठिकठिकाणी कॉर्नर बैठका घेतल्या जातील. तसंच मुक्कामाच्या ठिकाणी जाहीर सभा घेतल्या जातील. यामध्ये प्रमुख मागण्या म्हणजे ओबीसींचं आरक्षण वाचलं पाहिजे. एसी, एसटी समाजाची स्कॉलरशीप डबल झाली पाहिजे. केंद्रातील स्कॉलरशीपमध्ये राज्य स्वतः चा हिस्सा देत नाही. तसंच ओबीसीच्या विद्यार्थ्यांना जी स्कॉलरशीप मिळते ती तशीच्या तशी लागू झाली पाहिजे.