One Nation One Election: इंडियाच्या बैठकीला घाबरून 'एक देश एक निवडणूक' प्रयत्न सुरू; वड्डेटीवार यांची टीका

'एक देश एक निवडणुक' संदर्भात मोठे पाऊल उचलत केंद्र सरकारने माजी राष्ट्रपती रामनाथ कोविंद यांच्या अध्यक्षतेखाली एक समिती स्थापन केली आहे. ही समिती कायद्यातील सर्व बाबींचा विचार करेल. पीटीआय वृत्तसंस्थेने सूत्रांच्या हवाल्याने यासंबधीची माहिती दिली आहे. एक देश एक निवडणूक घेता येईल का या बाबींचा अभ्यास करण्यासाठी या महत्वाच्या समितीची स्थापना करण्यात आली आहे. यावर राज्याचे विरोधी पक्षनेते विजय वड्डेटीवार यांनी हल्लाबोल केला आहे.

यावेळी बोलताना विजय वड्डेटीवार म्हणाले की, इंडिया आघाडीच्या या बैठकीमुळे केंद्रातील सरकार विचलीत झाली आहे. एक देश एक निवडणुकसाठी १२ राज्यातील मुख्यमंत्री विरोधक आहेत. अशा स्थितीत मोठा आकडा गाठणं भाजपला कठिण आहे. तर माजी राष्ट्रपतींच्या अध्यक्षतेखालील जी समिती आहे, त्या समितीला काम करण्यासाठी किमान ३ महिन्यांपेक्षा आधिक कालावधी लागेल. तोपर्यंत डिसेंबर उजाडेल. तर या १२ राज्यातील मुख्यमंत्र्याच्या सहमतीशिवाय त्या राज्यातील विधानसभेच्या ठरावाशिवाय संविधानामध्ये बदल करायचा असेल तर एक तृतांश आकडा आता भाजपकडे आहे का येथून प्रश्न निर्माण होईल असं विजय वड्डेटीवार यांनी म्हटलं आहे.

तर काल राहुल गांधी यांनी अदाणी समुहावर केलेल्या आरोपांना बगल देण्यासाठी हे सर्व प्रयत्न सुरू आहेत. त्या विषयाचे महत्त्व कमी करण्यासाठी हा प्रयत्न सुरू आहेत. विरोधकांची एकजूट आणि या एकत्रित येण्याला ते घाबरले आहेत. म्हणून गॅस, पेट्रोलचे दर कमी करण्याचे प्रयत्न सुरू आहेत. येत्या काही दिवसांमध्ये डिझेल ६० रूपयांवर येण्याची शक्यता आहे. विरोधकांना, आणि पराभवाला घाबरून हे सर्व प्रयोग सुरू असल्याचंही विजय वड्डेटीवार यांनी म्हटलं आहे.

त्याचबरोबर एक देश एक निवडणुकसाठी विरोधकांनाही विश्वासात घेणे गरजेचे आहे. कारण देशातील १२ राज्यांमध्ये विरोधक मुख्यमंत्री आहेत. तर ६ राज्यांचे मुख्यमंत्री हे तटस्थ आहेत. अशा स्थितीत लागणारे बहुमत लागतं, ते भाजपकडे आहे का हा प्रश्नही आहे असंही ते पुढे म्हणाले आहेत.