Ajit Pawar: 'मी त्या गाडीत नव्हतोच', शरद पवारांसोबतच्या 'त्या' भेटीत काय घडलं? अजित पवारांनी सांगितलं स्पष्टच

राज्याच्या राजकारणात घडामोंडींना वेग आला असतानाच राष्ट्रवादी काँग्रेसचे अध्यक्ष शरद पवार आणि उपमुख्यमंत्री अजित पवार यांची शनिवारी (ता.१२) पुण्यातल्या कोरेगाव पार्क येथील अतुल चोरडिया यांच्या घरी भेट झाली होती. ही भेट झाल्याचे समोर आल्यानंतर राजकारणात खळबळ उडाली. या बैठकीमुळे शरद पवार यांच्याबद्दल इंडिया आघाडीत संभ्रम निर्माण झाला. शरद पवार यांची नेमकी भूमिका काय? ते भाजपासोबत की, इंडियासोबत? असा प्रश्न इंडियातील पक्षांच्या मनात निर्माण झाला होता.

त्यानंतर विरोधी पक्षातील नेत्यांनी त्यांची नाराजी जाहीरपणे बोलून दाखवली होती. त्यानंतर शरद पवारांनी आपली भुमिका स्पष्टपणे मांडली आहे. मी भाजपसोबत जाणार नाही असं त्यांनी स्पष्टपणे सांगितलं आहे. त्यानंतरही राज्याच्या राजकारणात शरद पवार अजित पवारांना वारंवार भेटतात, यावर चर्चा सुरू झाल्या आहेत. अशातच पुन्हा एकदा राज्याचे उपमुख्यमंत्री अजित पवारांनी या भेटीबाबत स्पष्टपणे सांगितलं आहे.

अजित पवार आज कोल्हापूरात ध्वजारोहणाच्या कार्यक्रमासाठी आले होते. त्यावेळी त्यांनी माध्यमांशी संवाद साधला. पत्रकारांनी त्यांना शरद पवार यांच्यासोबत झालेल्या भेटीबद्दल प्रश्न विचारला. त्यावर त्यांनी स्पष्टपणे सांगितलं आहे. अजित पवार बोलताना म्हणाले की, 'पुण्याच्या बैठकीच मनावर घेऊ नका. शरद पवार हे पवार कुटुंबातील ज्येष्ठ वडिलधारी व्यक्ती आहेत. मी त्यांचा पुतण्या आहे. माध्यमं अशा भेटीला प्रसिद्धी देतात. त्यातून समज-गैरसमज निर्माण होतात. फार तिथे काही वेगळं घडलं असं समजू नका'.

तर या बैठकीत राजकीय घडामोडींवर चर्चा झाली नाही, पवारसाहेब हे आमच्या कुटुंबाचे प्रमुख आहेत. या बैठकीला राजकीय रंग देऊ नका असंही पुढे अजित पवार म्हणालेत. चोरडिया यांचे आणि आमचे दोन पिढ्यांचे नाते आहे. चोरडिया हे पवारसाहेबांचे क्लासमेट आहेत. चोरडिया यांनी पवार साहेबांना जेवायला बोलावले होते. त्यावेळी जयंत पाटील देखील त्याठिकाणी पवारसाहेब यांच्यासोबत होते असे अजित पवार म्हणाले. दोन पिढ्या ओळखीच्या असणाऱ्या व्यक्तींच्या घरी जाणे काय चुकीचे? असेही अजित पवार यावेळी म्हणाले.

'जनतेला सांगेन, यापुढे केव्हाही भेटलो तर त्यातून कुठलाही अर्थ काढू नका. ती कौटुंबिक भेट असते मी लपून गेलेलो नाही, मी उजळ माथ्याने फिरणारा आहे' असंही पुढे अजित पवार म्हणाले आहेत.

अपघात झालेल्या गाडीत मी नव्हतो

तर भेटीनंतर अजित पवार बाहेर पडत असताना त्यांच्या गाडीचा अपघात झाला असं अनेक माध्यमांनी सांगितलं होतं. त्यासंबधीचे व्हिडीओ सोशल मिडीयावर व्हायरल झाले होते. त्यावर अजित पवार म्हणाले, "तुम्ही मला लपून गेल्याचं कुठे बघितलं?. मी उद्या तुमच्या घरी आलो, तर कधी निघायच हे मी ठरवणार. मी बैठकीला गेला हे मान्य करतो. पण चोरडिया यांच्या घरातून बाहेर पडलेल्या आणि धडकलेल्या गाडीत मी नव्हतोच असे अजित पवार म्हणाले.