'बायकोला खांद्यावर घेऊन नाचू शकतो, पण योगा नाही होणार', नरहरी झिरवळांबद्दल अजित पवार म्हणाले...

मुंबईः राष्ट्रवादी काँग्रेसच्या मेळाव्याचं आज आयोजन करण्यात आलेलं होतं. या कार्यक्रमात अजित पवार यांनी सरकारला जोरदार फटकारलं. शिवाय त्यांनी योग दिनाबद्दलचा एक किस्सा सांगून सभागृहात हशा पिकवला.

राष्ट्रवादी काँग्रेसच्या कार्यक्रमाला शरद पवार, सुप्रिया सुळे, प्रफुल्ल पटेल, जयंत पाटील, अजित पवार यांच्यासह पक्षाच्या सर्वच वरिष्ठ नेत्यांची उपस्थिती होती.

यावेळी बोलतांना अजित पवार म्हणाले की, आपली सत्ता असतांना शेतकऱ्यांना भारनियमनमुक्त केलं होतं. राष्ट्रवादीच्या नेत्यांना कारण नसतांना आरोपीच्या पिंजऱ्यात उभं केलं जात आहे. आपल्या नेत्यांची विनाकारण बदनामी केली जाते हे खपवून घेतलं जाणार नाही.

पवार पुढे म्हणाले की, आज जागतिक योग दिनानिमित्त विधिमंडळासमोर कार्यक्रमाचं आयोजन केलं होतं. कोट्यवधींची उधळण यासाठी केली गेली. तुम्हांला गरज असो की नसो, जाहिरातीच्या माध्यमातून मुख्यमंत्री-उपमुख्यमंत्र्यांना बघावं लागतं

नरहरी झिरवळांबद्दल अजित पवार म्हणाले...

अजित पवार म्हणाले, योग दिनासाठी मलाही बोलावलं होतं. अंबादास दानवेंना बोलावलं होतं आणि झिरवळ यांनाही बोलावलं होतं. मी झिरवळ यांना का गेला नाहीत, असं विचारलं तर ते म्हणाले, पोट एवढं वाढलं की योगा होतच नाही. योगा नाही झाला की आजूबाजूचे लोक वाढलेलं पोट बघतात. योगा होत नाही पण बायकोला खांद्यावर घेऊन नाचू शकतो म्हणाले.

अजित पवारांनी हा किस्सा सांगताच सभागृहात हशा पिकला.