चांद्यापासून बांद्यापर्यंत, आमचा अर्थसंकल्प सर्व घटकांसाठी - अजित पवार

Maharashtra Budget Session : विधीमंडळाचं अर्थसंकल्पीय अधिवेशन सध्या सुरू आहे. अर्थमंत्री अजित पवार यांनी आज राज्याचा अर्थसंकल्प (Maharashtra Budget 2022) सादर केला. त्यानंतर अजित पवार यांनी पत्रकारांशी संवाद साधला. कोरोना काळानंतरचा हा अर्थसंकल्प असल्यानं यामध्ये सर्वसामान्य नागरिकांना दिलासा मिळणार का? याकडे सर्वांचं लक्ष लागलं होतं. आमचं सरकार आलं आणि जगावर कोरोना आला, त्यामुळे जगाच्या, देशाच्या आणि राज्याच्या अशा सर्व अर्थव्यवस्थांवर ताण निर्माण झाला. केंद्राने जीडीपीच्या (GDP) साडेतीन टक्क्यांपर्यंत कर्ज उचलण्याची मुभा दिली होती. आम्ही तीन टक्क्यांपर्यंत कर्ज घेतलं. विकास कामांना निधी कमी न पडू देता, आम्ही हा अर्थसंकल्प तयार केला. चांद्यापासून ते बांद्यापर्यंतच्या सर्व घटकांच्या कामाला स्पर्श करण्याचा प्रयत्न केल्याचं अजित पवार (Ajit Pawar) म्हणाले.

राज्याच्या सर्वांगीण हिताचा हा अर्थसंकल्प आहे. नियमीत कर्जफेड करणाऱ्या शेतकऱ्यांसाठी २० लाख शेतकऱ्यांना प्रोत्साहन निधी म्हणून ५० हजार रुपये असे दहा हजार कोटी रुपयांची मदत शेतकऱ्यांना करणार आहोत. शेततळ्यासाठी ५० हजारांची मर्यादा ७५ हजार केली. शेतकऱ्यांना आधारभूत किंमत मिळण्यासाठी देखील प्रयत्न केला आहे असं अजित पवार म्हणाले.

सभागृहातून बाहेर येताच फडणवीसांची टीका

राज्य सरकारकडून आज सादर करण्यात आलेल्या योजना म्हणजे भाजपने यापूर्वी केलेल्या घोषणांचाच पाढा यंदाच्या अर्थसंकल्पात वाचला गेला आहे, अशी टीका विरोधी पक्ष नेते देवेंद्र फडणवीस यांनी केली आहे. गरीब, बारा बलुतेदारांच्या तोंडाला पाने पुसण्याचं काम या सरकारने केलं आहे. आताचा जो अर्थसंकल्प मांडला तो कोणत्याही प्रकारे महाराष्ट्राच्या विकासाला चालना देऊ शकत नाही. बजेटवरून चार बातम्या तयार होऊ शकतात. यापलिकडे काहीच नाही असे देखील फडणवीस यांनी म्हटले आहे.