Ajit Pawar : ना शरद पवार, ना अजित पवार! सरोज अहिरे नाशिकला परतल्या; कारण आलं समोर

मुंबईः शरद पवार यांच्या अत्यंत जवळच्या असलेल्या नाशिकच्या देवळाली मतदारसंघाच्या आमदार सरोज अहिरे नाशिकला परतल्या आहेत. त्यांचं समर्थन नेमकं कोणत्या गटाला, हे स्पष्ट झालेलं नाही. मागील दोन दिवसांपासून सरोज अहिरे नॉट रिचेबल होत्या.

राष्ट्रवादी काँग्रेसमध्ये सध्या उभी फूट पडली आहे. आज शरद पवार आणि अजित पवार दोन्ही गटांकडून बैठकांचं आयोजन करण्यात आलेलं आहे. त्यामुळे कुणाकडे किती संख्याबळ हे स्पष्ट होईल. दोन्ही गटांकडून आमदारांना व्हिप बजावण्यात आलेला आहे.

अजित पवार यांच्याकडे ४२ आमदारांचं पाठबळ असल्याचं सांगितलं जात आहे. तर शरद पवार यांच्याकडे केवळ ११ आमदार असल्याचं वृत्त 'टीव्ही९' ने दिलं. प्रत्यक्षात काय परिस्थिती आहे, हे समोर येणारच आहे.

राष्ट्रवादी काँग्रेसच्या देवळाली विधानसभा मतदारसंघाच्या आमदार सरोज अहिरे नाशिकला परतल्याची माहिती आहे. ना शरद पवार, ना अजित पवार.. अशी भूमिका त्यांनी सध्यातरी घेतल्याचं कळतंय.

नाशिकमध्ये राष्ट्रवादीचे ६ आमदार आहेत. त्यापैकी पाच आमदार अजित पवारांसोबत असल्याची माहिती आहे. रात्री उशिरा त्या नाशिकमध्ये परत आल्या आहेत. तब्येत बरी नसल्याचं कारण सांगून सरोज अहिरे नाशिकमध्ये परतल्या असून संध्याकाळी त्या आपली भूमिका स्पष्ट करतील, असं सांगितलं जातंय. 'एबीपी माझा'ने हे वृत्त दिलंय.

महत्त्वाचं म्हणजे अजित पवार गटाकडून ४४ आमदारांकडून प्रतिज्ञापत्र घेण्यात आलेलं असून त्यांना आजच्या बैठकीसाठी व्हिप लागू होणार आहे. आज मुंबईतल्या एमईटी कॉलेजमध्ये अजित पवार गटाच्या बैठकीचं आयोजन करण्यात आलेलं आहे. नेमके किती आमदार उपस्थित राहतात, हे काही वेळात कळेलच.