Ajit Pawar: "केसरकर आहेत म्हणून शालेय शिक्षण मंत्रालय सुरु, नाहीतर..."; अजित पवारांनी घेतली फिरकी

Ajit Pawar: राष्ट्रीय शिक्षक दिनानिमित्त आयोजित कार्यक्रमात बोलताना अजित पवार यांनी शुभेच्छा दिल्या. अजित पवार म्हणाले, आम्ही अनेक शिक्षणसंस्था चालवतो. आम्ही देखील अनेक अडचणींचा सामना करतो.  राज्याचा अर्थमंत्री म्हणून मी बोलत आहे. राज्य सरकार सर्वात जास्त खर्च शिक्षण विभागावर करतो. मात्र हा खर्च सत्कारणी लागला पाहीजे.

शिक्षण मंत्री दीपक केसरकर मेटाकुटीला येतात. ते आहेत म्हणून शालेय शिक्षण मंत्रालय सुरु आहे. ते बोलत असताना मी शेवटचं सांगतो, मी शेवटचं सांगतो म्हणत होते. मी आणि मुख्यमंत्री मोजत होतो. मात्र शेवट काही संपत नव्हता, असे शिक्षणमंत्री आपल्याला लाभले आहेत.

३० हजार शिक्षकांची आपण भरती घेणार आहोत. यामध्ये मेरिटला महत्व आहे. भरती करायला लागलो की महिला मेरीट म्हणून समोर येतात. पुरुष कुठे जातात काय माहित. आता ३० हजार जागांमध्ये २० हजार महिला आणि १० हजार पुरुष लागतील, १०० टक्के हे होणार आहे. कारण पुरुष मंडळींचं लक्ष नको तिकडे जास्त जात असते. त्यामुळे मेरिट राहले बाजुला अन् लक्ष चाललं कुणीकडं, ही शक्यता नाकारता येत नाही, असे अजित पवार म्हणाले.

शालेय शिक्षणाचा दर्जा वाढवायचा आहे. पुरस्कार मिळालेले शिक्षक आपले ब्रँड अॅम्बेसिटर आहेत, असं म्हटलं तर वावगे ठरणार नाही. कारण हे पुरस्कार क्रांती ज्योती सावित्रीबाई फुले यांच्या नावाने दिले जातात. ज्यांना पुरस्कार मिळालेत त्या शिक्षकांची मुले सुद्धा तुम्ही शिकवत असलेल्या शाळेत शिकत असावेत, असा विश्वास व्यक्त करतो, असे अजित पवार म्हणाले. यावेळी टाळ्या काही जास्त वाजल्या नाहीत, अशी फिरकी देखील त्यांनी घेतली. (Latest Marathi News)