पहाटेचा शपथविधी, शरद पवारांच्या वक्तव्यावर प्रश्न विचारताच अजितदादा भडकले

मुंबई - राज्यात विधानसभा निवडणुकीवेळी (Assembly Election) झालेल्या अजित पवार (Ajit Pawar) आणि देवेंद्र फडणवीस (Devendra Fadanvis) यांच्या पहाटेच्या शपथविधीची चर्चा आजही होत असते. यावरच विचाऱण्यात आलेल्या राष्ट्रवादी काँग्रेसचे अध्यक्ष शरद पवार (Sharad Pawar) यांनी बुधवारी म्हटलं होतं की, 'विधानसभा निवडणुकीनंतर मीच अजित पवार यांना देवेंद्र फडणवीस आणि भाजपासोबत (BJP) पाठवलं अशी चर्चा होत असते, पण मी पाठवलं असतं, तर त्यांनी राज्यच बनवलं असतं. त्यांनी अर्धवट काही काम केलं नसतं. मी अजित पवार यांना पाठवलं होतं यात काहीच अर्थ नाही.' एका कार्यक्रमात शरद पवार यांना प्रश्न विचारण्यात आला होता. आता शरद पवार यांनी केलेल्या वक्तव्यावर प्रश्न विचारल्यानंतर अजित पवारांनी बोलणं टाळलं.

शरद पवारांच्या वक्तव्यावर अजित पवार यांना प्रश्न विचारताच ते भडकले. ते म्हणाले की,'मला त्याबद्दल काही बोलायचं नाही, मी आधीच सांगितलं आहे. याबद्दल काही बोलायचं नाही, ज्यावेळेस मला वाटेल तेव्हा मी बोलेन, तो माझा अधिकार आहे.' विषय संपला, असं म्हणत अजित पवार यांनी पत्रकारांना पुढचा प्रश्न विचारण्यास सांगितलं.

शरद पवार यांनी भाजप शिवसेनेत अंतर वाढायला त्यांच एक वाक्य कसं कारणीभूत ठरलं तेसुद्धा कार्यक्रमात सांगितलं. निवडणुकीनंततर मी दिल्लीत बोललो होतो की फडणवीसांना बहुमतासाठी काही कमी पडत असेल तर आम्ही त्यावर गांभीर्यानं विचार करू. माझं ते वक्तव्य सेना-भाजप यांच्यातील अंतर वाढवण्यास उपयोगी पडलं असं वक्तव्य मिश्किलपणे शरद पवार यांनी केलं.

ते दोघेही एकत्र यावेत असा प्रयत्न केला असता तर आम्ही ५ वर्षे सत्तेबाहेर राहिलो असतो. सेनेत अस्वस्थता दिसत होती. मुख्यमंत्रीपदाची त्यांची मागणी होती. त्यावेली पोषक वक्तव्य केल्यानं नुकसान होणार नव्हतं. त्या एका वक्तव्यानं सेनेत अस्वस्थता निर्माण झाली आणि फडणवीस राष्ट्रवादीसोबत जाऊ शकतात अशी शक्यता बनली. त्यामुळेच सेना आमच्यासोबत सत्तेत आली असंही पवारांनी या कार्यक्रमात सांगितलं.