अमित शाह नगरमध्ये दाखल, सहकार परिषदेला सुरुवात

अहमदनगर : केंद्रीय गृहमंत्री आणि सहकारमंत्री अमित शाह (Union Home Minister Amit Shah) आज महाराष्ट्र दौऱ्यावर आहेत. आज प्रवरानगर येथे राज्यातील पहिली सहकार परिषद (Sahakar Parishad Pravaranagar) घेत आहेत. शाह नगरमध्ये दाखल झाले असून विरोधी पक्षनेते देवेंद्र फडणवीस (Devendra Fadnavis), रेल्वे राज्यमंत्री रावसाहेब दानवे, केंद्रीय अर्थराज्यमंत्री भागवत कराड यांसारखे भाजपचे मोठे नेते उपस्थित आहेत.

देशात पहिल्यांदा सहकार मंत्रालय तयार करण्यात आलं आहे. त्याचं मंत्रिपद अमित शाह यांच्याकडे देण्यात आलं. त्यानंतर अमित शाह पहिल्यांदा महाराष्ट्राचा दौरा करत आहेत. आज सहकाराची भूमी असलेल्या महाराष्ट्रात सहकार परिषद घेऊन सहकारातील अडचणी दूर करण्यासाठी अमित शाह इथे येत आहेत, असं फडणवीसांनी शाह यांच्या दौऱ्याबाबत माध्यमांशी बोलताना सांगितलं.

आमदार राधाकृष्ण विखे आणि खासदार सुजय विखे पाटील यांनी सहकार परिषदेचे आयोजन केले आहे. सहकार क्षेत्रातील तज्ज्ञ लोक यात सहभागी झाले आहेत. शिवाय सहकार विषयावर चर्चा होणार आहे. अमित शाह आज शिर्डी येथे साई दर्शनाने आपल्या दौऱ्याला सुरुवात करणार होते. पण, वेळेवर नियोजन बदलले. त्यामुळे शाह थेट सहकार परिषदेच्या ठिकाणी पोहोचले आहेत. सहकार परिषदेत विचारमंथन झाल्यानंतर अमित शाह साई दर्शनासाठी रवाना होणार आहेत.