Amit Shah: केंद्रीय गृहमंत्री अमित शहांनी कार्यकर्त्यांना दिला'हा' कानमंत्र, मित्रपक्षांना..
Latest Mumbai News: ‘आता मित्रांना जिंकवा, ते हरले तर सत्ता येईल का, ’ असा सवाल कार्यकर्त्यांना करीत ज्येष्ठ भाजप नेते आणि केंद्रीय गृहमंत्री अमित शहा यांनी २०२९ च्या निवडणुकीत स्वबळावर लढून एकहाती सत्ता आणण्याचा निर्धार बोलून दाखविला. ते भाजप कार्यकर्त्यांच्या मेळाव्यात बोलत होते. जागावाटपामुळे अस्वस्थ असणाऱ्या कार्यकर्त्यांना संयम ठेवण्याचा सल्ला देत त्यांनी प्रत्येक मतदान केंद्रांवर किमान
१० टक्के मते वाढविण्याचे आवाहन केले.
‘महाराष्ट्रातील सत्ता राखण्याचे आव्हान महायुती सक्षमपणे पेलू शकेल,’ असा विश्वास जागविताना कार्यकर्त्यांना मतदानाची टक्केवारी वाढविण्याचे आवाहन शहा यांनी केले. काँग्रेस देशभर सातत्याने पराभूत होत असताना विजयी होण्याचा दावा करीत आहे, त्याकडे लक्ष न देता भाजपच्या कार्यकर्त्यांनी मतांचा टक्का वाढविण्यासाठी प्रयत्न करावा, असे त्यांनी नमूद केले. शहा यांनी आज दोन वेगवेगळ्या बैठकांमध्ये भाजप नेते, कार्यकर्ते आणि पदाधिकाऱ्यांशी संवाद साधत त्यांची मते जाणून घेतली.