Andheri East Bypoll Election: भाजपची खेळी यशस्वी? अंधेरी पोटनिवडणुकीत अनेकांची नोटाला पसंती

अंधेरी पोटनिवडणुकीमधून भाजपने माघार घेतल्यानंतरही ऋतुजा लटकेंच्या विजयाचा मार्ग सोपा नसल्याचे सातत्याने बोललं जातं आहे. याचं कारण म्हणजे अंधेरी विधानसभा निवडणुकीआधी आणि दरम्यानच्या काळात झालेला नोटाचा प्रचार. यासंबधीच्या काही कथित ऑडिओ क्लिप्सही मध्यंतरी समोर आल्या होत्या. यासंबधित तक्रारीही ठाकरे गटाने निवडणूक आयोग आणि पोलिसांकडे तक्रार केली होती. ठाकरे गटाने नोटाचा प्रचार करणाऱ्यांच्या क्लिप्सही निवडणूक आयोग आणि पोलिसांना दिल्या होत्या. दरम्यान ठाकरे गटाच्या ऋतुजा लटके 58875 इतक्या मतांनी विजयी झाल्या आहेत.तर नोटाला 11569 इतकी मत मिळाली आहे.

निवडणूक होण्याआधी याबद्दल चर्चा दिसून आल्या पण त्याचा प्रत्यय आता मतमोजणी दरम्यान दिसून येत आहे. मतमोजणीच्या एकूण 19 फेऱ्या पार पडल्या. दरम्यान 15 व्या फेरीअंती ऋतुजा लटके यांना 55946 मते होती तर 10906 मते नोटाला मिळाली होती. या प्रत्येक फेरीअंती ऋतुजा लटके यांना सर्वाधिक मते दिसून आली तर दुसऱ्या नंबरवर दिसून आले ते नोटा. तसं पाहायला गेलं तर ऋतुजा लटके विरुद्ध अपक्ष अशी नाही तर ऋतुजा लटके विरुद्ध नोटा अशीच लढत पाहायला मिळाली आहे.

भाजपचे उमेदवार मुरजी पटेल यांनी माघार घेतल्याने त्यांचे कार्यकर्ते नाराज झाले. मुरजी पटेलांच्या माघारीनंतर ऋतुजा लटकेंच्या विरोधात वेगळीच खेळी खेळली. यासंबधित एक ऑडिओ क्लिप व्हायरल झाली होती. या व्हायरल ऑडिओ क्लीपमध्ये ठाकरे गटाविरोधात ‘नोटा’च्या बटणाचा प्लॅन बनवला जात असल्याचा दावा केला जात होता.

अंधेरी पूर्वचे आमदार दिवंगत रमेश लटके यांच्या निधनामुळे ही पोटनिवडणूक घेण्यात येत आहे. पोटनिवडणुकीची घोषणा झाल्यानंतर अनेक नाट्यमय घडामोडी घडल्या. शिवसेनेत फूट पडल्यानंतरची ही पहिलीच विधानसभा निवडणूक होती. त्यामुळे ठाकरे गटाकडून या निवडणुकीसाठी जोर लावण्यात आला होता. तर, दुसरीकडे भाजपने या पोटनिवडणुकीसाठी मुरजी पटेल यांना उमेदवारी जाहीर केली होती. मात्र, अचानकपणे त्यांची उमेदवारी मागे घेत असल्याची घोषणा करण्यात आली. त्यानंतर पटेल समर्थकांमध्ये प्रचंड नाराजी निर्माण झाली होती. पटेल यांच्या कार्यकर्त्यांनी भाजपविरोधातही घोषणाबाजी केली होती.