अनिल देशमुख यांच्या जामीन अर्जावर विशेष पीएमएलए न्यायालयात सुनावणी

मुंबई : राज्याचे माजी गृहमंत्री आणि राष्ट्रवादी काँग्रेसचे नेते अनिल देशमुख (Anil Deshmukh) यांनी मनी लाँड्रिंग प्रकरणात मुंबईतील विशेष पीएमएलए न्यायालयात नियमित जामिनासाठी अर्ज (Bail application) दाखल केला होता. त्यांच्या अर्जावर विशेष पीएमएलए न्यायालयात सोमवारी (ता. १४) सुनावणी झाली. सीबीआयने आज सुनावणीदरम्यान संजीव पालांडे आणि कुंदन शिंदे यांचे स्टेटमेंट रेकॉर्ड करण्यासाठी अर्ज केला. न्यायालयाने सहमती देत १६ आणि १७ फेब्रुवारी रोजी स्टेटमेंट रेकॉर्ड करण्यासाठी परवानगी दिली.

ज्येष्ठ वकील ॲड. विक्रम चौधरी यांनी अनिल देशमुख यांच्या वतीने युक्तिवाद केला. माजी गृहमंत्री अनिल देशमुख हे ७३ वर्षांचे आहे. त्यांना काही शारीरिक व्याधी आहेत. तीन महिन्यांहून अधिक काळापासून ते तुरुंगात आहे, तेव्हा त्यांना जामीन देण्याची मागणी केली. या प्रकरणात शिक्षा झाली तर जास्तीत जास्त सात वर्षांची होईल.

या प्रकरणात जेव्हाही सुनावणी होते त्याआधी अनिल देशमुख यांच्या कुटुंबीयांवर रेड पडते. चौदा वेगवेगळ्या दिवशी केंद्रीय तपास यंत्रणांनी आतापर्यंत ७० वेळा छापेमारी केली आहे, हे विशेष. २१ एप्रिल २०२१ रोजी पहिल्यांदा सीबीआयने एफआयआर नोंदवला होता. मी महाराष्ट्राचा तत्कालीन गृहमंत्री असल्याने अडकवले जात आहे, असे अनिल देशमुख (Anil Deshmukh) यांचे म्हणणे आहे.

१ नोव्हेंबर रोजी ईडीने केली होती अटक

अनिल देशमुख (Anil Deshmukh) यांचा डिफॉल्ट जामीन अर्ज (Bail application) न्यायालयाने १७ जानेवारी रोजी फेटाळून लावला होता. मुंबईचे माजी पोलिस आयुक्त परमवीर सिंग यांनी मुख्यमंत्र्यांना लिहिलेल्या लेटर बॉम्बमुळे अडचणीत सापडलेले देशमुखांची ईडी मनी लाँड्रिंग (Money loading) आरोपाअंतर्गत चौकशी सुरू आहे. १ नोव्हेंबर रोजी ईडीने देशमुखांना अटक केली आणि कोठडीत रवानगी केली होती. तेव्हापासून देशमुख आर्थर रोड कारागृहात आहेत.