'बंदी असताना फडणवीस फटाके कसे फोडणार?' अनिल परब यांचा सवाल

मुंबई : माजी गृहमंत्री अनिल देशमुख (Anil Deshmukh) यांना ईडीने मध्यरात्री अटक केली. त्यानंतर भाजप नेते किरीट समोय्या यांनी ''अनिल देशमुखांच्यानंतर पुढचा नंबर अनिल परब यांचा असेल'' असा दावा केला होता. आता त्यावर मंत्री अनिल परब (Anil Parab) यांनी प्रतिक्रिया दिली आहे. तसेच त्यांनी विरोधी पक्षनेते देवेंद्र फडणवीसांना देखील टोला लगावला आहे.

''मी न्यायालयीन प्रक्रियेला मानणारा माणूस आहे. मला ईडीचं कुठलंही समन्स आलेलं नाही. यापूर्वीही मी ईडीच्या ऑफिसमध्ये गेलो आणि त्यांना उत्तरं दिलेय. मला कोणीही प्रश्न विचारले तरी मी उत्तर द्यायला तयार आहे'', असे अनिल परब म्हणाले.

परमबीरसिंह यांना कोणी विदेशात पाठविले? असा प्रश्न विचारला असता, परब म्हणाले, '' त्यांना चौकशीसाठी बोलावले जाते. ते आले नाहीतर त्यांना फरार घोषित केले जाईल. तसेच देवेंद्र फडणवीसांनी दिवाळीनंतर बॉम्ब फोडणार असं वक्तव्य केलं होतं. त्यावर देखील त्यांनी टीका केली आहे. फटाक्यावर बंदी आहे, मग फडणवीस फटाके फोडणार कसे? असा सवाल त्यांनी उपस्थित केला.

राष्ट्रवादी आणि शिवसेनेला तपास यंत्रणांकडून टार्गेट केलं जातंय. आमच्यावर झालेल्या आरोपांचं उत्तर देऊन आमची बाजू मांडणं हे आमचं काम आहे. आम्ही ते करतो, असेही परब म्हणाले. तसेच त्यांनी नवाब मलिकांकडून समीर वानखेडे यांच्यावर होत असलेल्या आरोपावर देखील भाष्य केले. ''महाराष्ट्राच्या राजकारणात असं कधीही झालं नव्हतं. असं होऊ नये अशी माझी इच्छा आहे. शेवटी प्रत्येकाचं खासगी आयुष्य आहे. तेच खासगीच राहावं'', असंही अनिल परब म्हणाले.