..अन्यथा बडतर्फ प्रक्रियेला सुरुवात करू; परिवहन मंत्र्यांचा इशारा

मागील काही दिवस राज्यभर एसटी कर्मचाऱ्यांचे आंदोलन सुरु आहे. राज्यसरकराने कर्मचाऱ्यांच्या मागण्या मान्य केल्या जातील असे आश्वासन दिले होते. प्रवाशांचे हाल होत असून एसटी महामंडळाला तोटा होत आहे, त्यामुळे लवकरात लवकर कर्मचाऱ्यांनी कामावर हजर व्हावे असे आवाहनही करण्यात आले होते. दरम्यान, आज पुन्हा एकदा परिवहन मंत्री यांनी एसटी कर्मचाऱ्यां संबंधित बोलले आहेत. कामावर हजर न राहिलेल्या एसटी कर्मचाऱ्यांच्या बडतर्फ प्रक्रियेला सुरुवात केली जाईल असा इशारा त्यांनी दिला आहे.

ते म्हणाले, एसटी कर्माचाऱ्यांना आजपासून शो कॉज नोटीस देण्यास सुरुवात करण्यात येणार आहे. कर्माचाऱ्यांना कामावर हजर न राहिल्यास कठोर कारवाईला सामोरे जावे लागणार असल्याचं त्यांनी सांगितलं आहे. त्यानंतरही कामगार कामावर हजर राहीले नाहीत, तर राज्यसरकार कारवाईला सुरुवात करणार असल्याचेही ते म्हणाले आहेत. दरम्यान, आता परिवहन मंत्र्यांच्या इशाऱ्यानंतर कर्मचारी कोणता निर्णय घेणार याकडे सर्वांचे लक्ष लागले आहे.

दरम्यान, एसटी महामंडळातील 10 हजार कर्मचारी बडतर्फीच्या उंबरठ्यावर आहेत. निलंबित केलेल्या कर्मचाऱ्यांना आपले म्हणणे मांडण्यासाठी बोलावले जाणार आहे. म्हणणे मांडण्यासाठी 3 संधी दिल्यानंतरही गैरहजर राहिल्यास त्यांचे नावे 7 दिवसांची बडतर्फीची नोटिस दिली जाणार आहे. 7 दिवसांत म्हणणं न मांडल्यास अखेर कर्मचाऱ्यांना बडतर्फ करण्यात येणार आहे. नवीन वर्षात एसटीच्या 10 हजार कर्मचाऱ्यांना नोकरी गमवावी लागणार असल्याचेही सांगण्यात आले आहे.