मोठी बातमी! त्र्यंबकेश्वरच्या पेड दर्शनावर पुरातत्त्व विभागाचा आक्षेप, आर्थिक देवाणघेवाणीवरही प्रश्‍नचिन्ह

नाशिक : त्र्यंबकेश्वरच्या पेड दर्शनाला पुरातत्त्व विभागाने आक्षेप घेतला आहे. गेल्या १६ मार्चला देवस्थानच्या अध्यक्षांना पत्र देत त्र्यंबकेश्वर मंदिरातील देणग्यांसह आर्थिक देवाणघेवाणीशी संबंधित काही आक्षेपही विभागाने नोंदवले आहेत.

राष्ट्रीय पुरातत्त्व विभागाच्या छत्रपती संभाजीनगर (पूर्वीच्या औरंगाबाद) विभागीय कार्यालयाने हे पत्र दिले आहे, त्यावर आता देवस्थानकडून काय भूमिका घेतली जाते, याकडे त्र्यंबकराजाच्या भक्तांचे लक्ष लागले आहे.

पुरातत्त्व विभागाच्या पत्रातील आक्षेपानुसार त्र्यंबकेश्वर मंदिराच्या उत्तरेकडील प्रवेशद्वारातून प्रवेश करणाऱ्या भाविकांकडून शुल्क आकारून दर्शन दिले जाते ते बंद करावे. पुरातत्त्व कायदा (एएमएएस आर) १९५८, नियम १९५९ आणि त्याचा दुरुस्ती आणि प्रमाणीकरण कायदा २०१० नुसार केंद्रीय संरक्षित स्मारकामध्ये सशुल्क दर्शनाला परवानगी नाही, हा प्रमुख आक्षेप आहे.

याशिवाय पुरातत्त्व विभागाच्या पत्रात त्या विभागाच्या डी. एस. दानवे आणि दीपक चौधरी या पथकाने १५ मार्च २०२२ ला दिलेल्या भेटीत आढळलेली निरीक्षणे पत्रात नोंदवली आहेत. याबाबत देवस्थान अध्यक्षांनी वैयक्तिक लक्ष देण्याची आणि केंद्रीय संरक्षित स्मारकाच्या नियमानुसार पालन करण्याची विनंती केली आहे.

पथकाला आढळलेल्या त्रुटी

प्रामुख्याने शिवरात्री उत्सवानिमित्त मंदिर परिसरात तात्पुरते चालणारे/मोबाईल वॉक वे आता स्मारकाच्या संरक्षित क्षेत्रातून काढून टाकण्यात यावेत. मंदिर परिसरात विविध ठिकाणी दानपेट्या ठेवण्यात आल्या आहेत, ज्या बेकायदेशीर आहेत, त्या तत्काळ हटवाव्यात. मंदिराच्या आवारात देणगी गोळा करण्याच्या पोर्टेबल केबिन बसवल्या आहेत, त्या तत्काळ काढून टाकण्यास सांगितले आहे. मंदिर परिसराच्या उत्तर-पश्चिम कोपऱ्यात सेवा न करता येणारे/न वापरलेले साहित्य टाकण्यात आले आहे, ज्यामुळे मंदिर परिसराचे पावित्र्य, दृश्य खराब होत आहे. ते ताबडतोब काढून टाकावे.