"नवी प्रकरणं बाहेर येताहेत म्हणून सरकार अधिवेशनापासून पळतंय"

मुंबई : राज्य शासनातील रोज नवंनवी प्रकरणं बाहेर येत आहेत त्यामुळे सरकार अधिवेशनापासून पळ काढत आहे, असा आरोप विरोधीपक्ष नेते देवेंद्र फडणवीस यांनी केला आहे. उद्यापासून राज्याचं दोन दिवसीय पावसाळी अधिवेशन सुरु होत आहे. याच्या पूर्वसंध्येला फडणवीस यांनी पत्रकार परिषद घेऊन सरकारला धारेवर धरलं. (as new cases are coming out state gov is running away from the convention says Fadnavis)

फडणवीस म्हणाले, राज्यातल्या विविध खात्यात होणाऱ्या भ्रष्टाचारावर आम्ही बोलूच नयेत अशी यंदाच्या अधिवेशनाची रचना करण्यात आली आहे. पण आम्ही हा निर्णय केला आहे की, सभागृहात जे असेल ते मांडायचा प्रयत्न करु. जे मांडू दिलं जाणार नाही, ते आम्ही रस्त्यावर येऊन, जनतेत जाऊन मांडू.

...तर आम्ही रस्त्यावर उतरल्यास विचारु नका

कोरोनाच्या नावावर अधिवेशन संपवलं जातं, पण बाकी इतर सर्व गोष्टी सुरु आहेत. अशा प्रकारे लोकशाहीची थट्टा बंद केली पाहिजे. आम्हाला जनतेचे प्रश्न सभागृहात मांडू दिले जाणार नसतील तर उद्या आम्ही रस्त्यावर उतरुन आंदोलन केलं तर ते कशासाठी करता हे आम्हाला कोणी विचारु नये. सरकारद्वारे अधिवेशनाच्या सर्व प्रमुख परंपरा पायदळी तुडवल्या जात आहेत.

सरकारमधील विसंवादामुळं अध्यक्षांची निवड रखडली

त्याचबरोबर राज्यातील सध्याच्या परिस्थितीनुसार अधिवेशनाच्या पार्श्वभूमीवर विधानसभा अध्यक्षांची निवड केली जाईल असं दिसत नाही. तीन पक्षांमध्ये कुठलंही एकमत नाही, आमचं स्पष्ट मत होत की तुमच्याकडे बहुमत आहे ना मग हे पद भरलं गेलं पाहिजे. सरकारमधील विसंवादातून ही परिस्थिती निर्माण झाली आहे, असा आरोपही यावेळी फडणवीस यांनी केला.