पक्षाचे आदेश झुगारून मविआचे आमदार मुर्मू यांना मतदान करतील - शेलार

राष्ट्रपती पदाच्या निवडणुकीत भाजपच्या उमेदवार द्रौपदी मुर्मू यांचा विजय निश्चित आहे. पक्षाचे आदेश झुगारून महाविकास आघाडीचे आमदार मुर्मू यांना मत देतील, असा विश्वास भाजप नेते आशिष शेलार यांनी व्यक्त केला आहे. आज ते मुंबईत बोलत होते. पक्षाच्या पलिकडे जाऊन राष्ट्रपती पदाच्या निवडणुकीत कॉंग्रेस, राष्ट्रवादीचे आमदारही एनडीएच्या उमेदवार द्रौपदी मुर्मू यांना मतदान करतील असंही ते म्हणाले. दरम्यान, महाराष्ट्रात महाविकास आघाडीचं अस्तित्व दिसत नाही, असा टोलाही त्यांनी लगावला आहे.

पुढे शेलार म्हणाले, काही नेत्यांना सकाळी बोलायचं एवढच काम उरलं आहे, असा टोमणाही त्यांनी शिवसेना खासदार संजय राऊत यांना लगावला आहे. ते म्हणाले, राष्ट्रपती पदाच्या उमेदवारासाठी महाराष्ट्रातून मोठ्या प्रमाणात मतदान होईल. महाविकास आघाडीचं राज्यात अस्तित्व दिसत नाही, त्यांच्यात समन्वय नाही, असंही ते म्हणाले आहेत.

सर्वाच्च न्यायालयात शिंदे सरकारच्या बाजूने लागले. त्यामुळे आता शिवसेनेच्या काही नेत्यांना सकाळी माध्यमांसमोर बोलायचं आणि दुपारी न्यायालयात याचिका दाखल करायची इतकच काम राहिलं आहे, असा टोला त्यांनी सेनेला लगावला आहे. द्रौपदी मुर्मू यांना भरघोस मतदान होईल, असंही त्यांनी स्पष्ट केलं आहे.