"काश्मिरी हिंदूंच्या वेदना दाखवणारा सिनेमा काढण्याचा प्रयत्न केला तर .."

विवेक अग्निहोत्री (Vivek Agnihotri) दिग्दर्शित ‘द काश्मीर फाईल्स’ सिनेमागृहांमध्ये प्रदर्शित झाला. 1990 मध्ये नरसंहाराला बळी पडलेल्या काश्मिरी पंडितांची हृदयद्रावक कथा या चित्रपटातून दर्शवण्यात आली आहे. हा चित्रपट बॉक्स ऑफिसवर दणक्यात कमाई करत आहे मात्र काही थिएटर मालक हा सिनेमा काढणार अशी चर्चा सुरू आहे. यावर भाजप नेते अतुल भातखळकर यांनी ट्वीट करत सिनेमा काढण्याचा प्रयत्न झाला तर थिएटर चालकांना योग्य तो धडा शिकवू, असा स्पष्ट इशारा दिला.

अतुल भातखळकर ट्वीट करत म्हणाले, “काश्मीर फाईल्स हा सिनेमा तिकीट बारीवर धोधो बिजनेस करतोय, पण तरीही काही थिएटर मालक हा सिनेमा काढणार अशी चर्चा सुरू आहे. ठाकरे सरकारच्या दबावामुळे हे सुरू आहे. काश्मिरी हिंदूंच्या वेदना दाखवणारा हा सिनेमा काढण्याचा प्रयत्न झाला तर थिएटर चालकांना योग्य तो धडा शिकवू हे याद राखा.”

1990 मध्ये नरसंहाराला बळी पडलेल्या काश्मिरी पंडितांची हृदयद्रावक कथा या चित्रपटात दाखवण्यात आली आहे. अनुपम खेर (Anupam Kher), दर्शन कुमार आणि मिथुन चक्रवर्ती यांच्या मुख्य भूमिका असलेला या चित्रपटाचा ट्रेलर प्रदर्शित झाला, तेव्हापासून त्याची सोशल मीडियावर चर्चा सुरु झाली.

‘द काश्मीर फाईल्स’ने शनिवारला पहिल्या दिवशी 3.55 कोटी रुपये आणि दुसऱ्या दिवशी 8.50 कोटी रुपयांची कमाई करत या चित्रपटाने दोन दिवसांत 12.05 कोटी रुपयांचा गल्ला जमवला आहे. देशातील निवडक थिएटर्समध्येच हा चित्रपट प्रदर्शित होऊनसुद्धा केलेली कमाई ही खूपच सकारात्मक आहे. महाराष्ट्रात काही थिएटर मालक हा सिनेमा काढणार, अशी चर्चा सुरु आहे, त्यामुळे या चित्रपटावरुन वाद चिघळण्याचीही दाट शक्यता आहे.