महाराष्ट्राचा खरा अपमान जयंत पाटलांनी केला; भातखळकरांचा पलटवार

राजकीय वातावरणात सध्या एकमेकांवर आरोपप्रत्यारोप सुरु आहेत. लोकसभेत सुरु असलेल्या नेत्यांच्या भाषणांवर विरोधक आणि सत्ताधारी गटांकडून टीका सुरु आहेत. दरम्यान आज भाजपा (BJP MLA) आमदार अतुल भातखळकर (Atul Bhatkhalkar) यांनी सुप्रिया सुळे (Supriya Sule) आणि संजय राऊत (Sanjay Raut) यांच्यावर निशाण साधला आहे.

ते म्हणाले, काल लोकसभेत (PM Modi) मोदींनी काँग्रेसवर (Congress) केलेली टीका संजय राऊत आणि सुप्रिया सुळे यांना भलतंच लागली आहे. त्यामुळे दोन्ही नेते राज्याचा अपमान झाला अशी खोटी आरडाओरड करत आहेत. मात्र महाराष्ट्राचा (Maharashtra) खरा अपमान हा काल झाला आहे. जलसंपदा मंत्री जयंत पाटील (Jayant Patil) यांनी केला आहे. शासकीय दुखवटा असताना शासकीय कार्यक्रमाचे आयोजन करत लतादीदींसह त्यांनी देशाचा अपमान केला असल्याचा हल्लाबोलही त्यांनी केला आहे.

पुढे ते म्हणाले, तुम्ही दोघांनी आधी यासंदर्भात बोलावे आणि मग पंतप्रधान मोदी यांनी केलेल्या भाषणावर प्रतिक्रिया द्या. जेव्हा सर्व जग सांगत होते जिकडे आहे तिकडे थांबा, अशावेळी मुंबई (Mumbai) आणि राज्यातील मजुरांना, स्थलांतरीतांना भडकावून यूपी, बिहारला पाठवण्याचे काम शिवसेना आणि कॉंग्रसने केले आहे ही वस्तुस्थिती असल्याचा आरोपही त्यांनी केला आहे.