अविनाश भोसले यांना १० दिवसांची सीबीआय कोठडी

मुंबई : उद्योगपती अविनाश भोसले यांना कोर्टाने १० दिवसांची सीबीआय कोठडी सुनावली आहे. दरम्यान त्यांना २६ मे रोजी सीबीआयने डीएचएफएल आणि येस बॅंक घोटाळ्याप्रकरणी अटक केली होती. याप्रकरणी आज मुंबईतील विशेष सीबीआय कोर्टात सुनावणी पार पडली आहे.

(Avinash Bhosale 10 Day's CBI Custody)

कोर्टाने अविनाश भोसले यांना ८ जूनपर्यंत सीबीआय कोठडी सुनावली आहे. सीबीआयने कोर्टात कोठडीची मागणी केली होती. तर अविनाश भोसले यांनी आपल्याला बेकायदेशीररित्या अटक केल्याचा दावा केला होता. त्यानंतर चौकशीसाठी कोर्टाने त्यांना सीबीआय कोठडी सुनावली आहे. कोर्टाच्या आदेशानुसार त्यांना ८ जूनपर्यंत सीबीआयच्या चौकशीला सामोरं जावं लागणार आहे.

दरम्यान अविनाश भोसले यांना 26 मे रोजी सीबीआयने अटक केली होती. डीएचएफएल आणि येस बँक घोटाळा प्रकरणात त्यांना अटक केली आहे. त्याअगोदरही त्यांची ईडी आणि सीबीआयकडून चौकशी करण्यात आली होती. त्यांना अटक करण्यात आल्यावर आज त्यांच्या या प्रकरणावर विशेष सीबीआय कोर्टात सुनावणी पार पडली आहे.

अविनाश भोसले हे पतंगराव कदम यांचे व्याही आणि विश्वजित कदम यांचे सासरे आहेत. ते पुण्यातील प्रसिद्ध उद्योगपती आहेत. पुण्यातील बाणेर भागात त्यांचे अलिशान घर आहे. तसेच त्यांच्याकडे तीन हेलिकॉप्टर्स आहेत. त्यांच्या घरावर हेलिपॅडही आहेत. राजकारणी लोकांना ते हेलिकॉप्टर्स भाड्याने देतात त्यामुळे ते सारखे चर्चेत असतात.