जीवनाचं सार्थक झालं! तब्बल 30 वर्षे पायी वारी करणाऱ्या 'या' दाम्पत्याला मिळाला शासकीय पूजेचा मान!

पंढरपूर : आज आषाढी एकादशीनिमित्त मुख्यमंत्री एकनाथ शिंदे (Eknath Shinde) यांनी सपत्नीक विठ्ठल-रुक्मिणी मंदिरात महापूजा केली. मुख्यमंत्री म्हणून एकनाथ शिंदे यांना दुसऱ्यांदा पूजेचा हा मान मिळाला.

तसंच अहमदनगर (Ahmednagar) जिल्ह्यातील वाकडी गावातील काळे दाम्पत्याला यंदा पूजेचा मान मिळाला आहे. भाऊसाहेब आणि मंगल काळे हे गेल्या 30 वर्षांपासून पंढरीची पायी वारी करत आहेत. भाऊसाहेब व्यवसायानं शेती करतात.

हा मान मिळाल्यानं दाम्पत्याला गहिवरून आलं. आज एकादशीच्या दिवशी पांडुरंगाचे दर्शन व्हावे यासाठी ते सकाळी सहा वाजता रांगेत उभा राहिले होते. गेल्या तीस वर्षांपासून कोरोनाचा दोन वर्षांचा अपवाद वगळता न चुकता जोडीनं त्यांनी वारी केलीये.

असा महापूजेचा मान मिळेल असं कधीच वाटलं नव्हतं. हे सर्व कर्ता करविता तो पांडुरंग आहे. आज आमच्या जीवनाचं सार्थक झालं, आम्ही धन्य झालो. आम्हाला दोन मुलं अन् दोन मुली आहेत. आम्ही देवगड संस्थानच्या दिंडीतून पायी वारी करतो, असं मानाच्या वारकऱ्यांनी यावेळी सांगितलं. हा मान मिळताच त्यांच्या चेहऱ्यावर आनंद दिसत होता.

मुख्यमंत्री शिंदेंचे विठुरायाला साकडे

आषाढीनिमित्त शासकीय महापूजेनंतर मुख्यमंत्री शिंदेंनी विठुरायाकडं बळीराजाला चांगले दिवस येऊ देत, शेतकऱ्यांना कष्टकऱ्यांना चांगले दिवस येऊ देत. पाऊस चांगला पडू दे. राज्य सुजलाम सुफलाम होऊ दे, असे मागणे मागितले. तसेच महापूजेनंतर आयोजित सत्कार सोहळ्यामध्ये मुख्यमंत्र्यांनी पंढरपूरच्या विकास आराखड्यासह इतर अनेक मुद्द्यांवर भाष्य केलं.