Devendra Fadnavis : पोलिस भरतीला गेलेल्या तरुणांची हत्या; माओवादी, नक्षलवाद्यांना फडणवीसांचा थेट इशारा

कराड : माओवादी किंवा नक्षलवाद्यांच्या (Naxalists) मुलाला पोलिस दलात भरती होण्यासाठी गेल्यावर त्यांची हत्या केली जात असेल तर सरकारकडून त्यांचे प्रयत्न हाणून पाडले जातील. त्यामुळे निश्चितपणे अशा घटना आटोक्यात आणण्यात येतील, अशी ग्वाही उपमुख्यमंत्री तथा गृहमंत्री देवेंद्र फडणवीस यांनी आज येथे दिली.

कराड दौऱ्यावर आले असता ते पत्रकारांशी बोलत होते. फडणवीस (Devendra Fadnavis) म्हणाले, गडचिरोलीमध्ये पोलीस भरतीसाठी गेलेल्या तरुणाची हत्या केल्याच्या घटना नक्षलवाद्यांनी किंवा मौवाद्यांनी यापूर्वीही केल्या आहेत. असे प्रयत्न सरकार म्हणून आपण हाणून पाडले आहेत. जनतेनेही हाणून पाडले आहेत.

गडचिरोलीच्या पोलीस फोर्समध्ये (Gadchiroli Police Force) नक्षलवादी मुले भरपूर प्रमाणात आहेत. अजूनही भरती होण्याचा त्यांचा ओघ कायम आहे. माओवाद्यांचे एलिमिनेशन गेल्या काही वर्षात आपण केले आहे. त्यामुळे निश्चितपणे ते अशा घटना घडवण्याचा प्रयत्न करतात.

मात्र, तेथील पोलीस यंत्रणा खूप चांगली असल्यामुळे त्यांना असे प्रकार घडवून देत नाहीत. निश्चितपणे असे प्रकार सरकार म्हणून आम्ही यापुढे होऊ देणार नाही यासाठी आवश्यक ती कार्यवाही केली जाईल, असा इशारा फडणवीस यांनी दिला.