'शिवसनेचं उपऱ्यांच्या मदतीने सरकार, १०० कोटींच्या वसुलीवर शिक्कामोर्तब'

शिवसेनेच्या दसरा मेळाव्यात मुख्यमंत्री उद्धव ठाकरे यांनी केलेल्या भाषणावर आता भाजप नेत्यांकडून टीका केली जात आहे. भाजपच्या नेत्या चित्रा वाघ यांनी आज बाळासाहेबांसारख्या ताठ कण्याच्या नेत्याची कमतरता जाणवतेय असं म्हणत उद्धव ठाकरेंवर निशाणा साधला. तसंच भाजपवर उद्धव ठाकरेंनी केलेल्या टीकेला उत्तरही दिलं आहे. उद्धव ठाकरे यांनी उपरे उमेदवार घेतात आणि म्हणे जगातला सर्वात मोठा पक्ष असं म्हणत भाजपवर टीका केली होती. त्यावर चित्रा वाघ यांनी म्हटलं की, उपऱ्याचं महत्त्व माननीय मुख्यमंत्र्यांना चांगलंच माहित आहे.

चित्रा वाघ यांनी ट्विटरवरून उद्धव ठाकरेंसह महाविकास आघाडीवर टीका केली. त्यांनी म्हटलं की, शिवसेनेनं उपऱ्यांच्या मदतीनंच हे महाविकास आघाडी सरकार स्थापन केलंय. झोळी घेतलेला ‘फकीर’ नसल्याचं राज्याचे सन्माननीय मुख्यमंत्री बोलताहेत हे खरंय. यामुळे १०० कोटींच्या वसूलीवर शिक्कामोर्तब झाल्याचाही टोला त्यांनी लगावला.

'मी वचन पाळण्यासाठी मुख्यमंत्री झालो. त्यांनी शब्द पाळला असता आणि शिवसैनिकाला मुख्यमंत्री केलं असतं तर कदाचित मी राजकारणातून बाजुला झालो असतो. मै फकीर हू... झोली फैला के बैठा हू, असे कर्मदरिद्री विचार आमचे नाहीत. हिंमत असेल तर सरकार पाडून दाखवाच, असे आव्हान उद्धव ठाकरे यांनी भाषणातून दिले होते.

संजय राठोड, महेबूब शेख, निलेश लंके, हे सरकारचे जावई अद्याप गजाआड का गेले नाहीत असा सवाल करताना चित्रा वाघ म्हणाल्या की, महिला अत्याचाराचा मळा फुलवण्याचं काम सरकारचेच मंत्री करताहेत अन् मुख्यमंत्र्यांचं ‘नाचता येईना असं सुरूय. ही तर विचारांची दिवाळखोरी असल्याची टीका चित्रा वाघ यांनी केली.