शरद पवारांचे ओबीसी प्रेम बेगडी, पडळकर यांची टीका

आटपाडी - ज्येष्ठ नेते शरद पवार यांचे ओबीसींवरील प्रेम बेगडी असल्याची टिका भाजपचे आमदार गोपीचंद पडळकर यांनी व्यक्त केली. मराठा आरक्षणाबाबत एक शब्दही काढलेला नाही तेच आज मराठा आरक्षणावर भूमिका मांडू लागले आहेत, असा टोलाही त्यांनी हाणला. आज ते पत्रकार परिषदेत ते बोलत होते.

ते म्हणाले, ‘‘पवार कुठलेही काम हेतुशिवाय करीत नाहीत. आपला खरा हेतू कधीच दाखवत नाहीत. केंद्राने ताट वाढलंय खरे आहे. तुमचे हात पण बांधले गेलेत तेही खरे आहे. पण हे हात कुणामुळे बांधले गेले, असा सवाल त्यांनी केला. राज्यात सत्तेत असताना त्यांनी करामतीने मराठा समाजाचे हक्काचे आरक्षण घालवले आहे. २०११ चा जनगणना अहवाल आता मागत आहेत. त्यातला घोळ ते सहभागी असलेल्या मनमोहनसिंग सरकारनेच घातला आहे. मराठा आरक्षणाचे मागासलेपण सिद्ध करण्याची कोणतीही प्रक्रिया आजअखेर सुरू केलेली नाही. आजपर्यंत मराठा आरक्षणाबाबत बोलत नव्हते ते आज भूमिका मांडायला लागले आहेत. हाच बहुजनांचा प्रस्थापितांविरोधातील पहिला विजय आहे.

ओबीसी, मराठ्यांची केंद्राकडून फसवणूक - शरद पवार

पन्नास टक्क्यांची अट कायम ठेवून ओबीसी आणि मराठा समाजाला आरक्षण द्या, असे म्हणणे म्हणजे शुद्ध फसवणूक आहे, अशा शब्दात राष्ट्रवादी काँग्रेसचे अध्यक्ष शरद पवार यांनी केंद्र सरकारवर निशाणा साधला. महाराष्ट्रात आधीच ६५ टक्के आरक्षण आहे. यामध्ये तुम्ही आणखी भर घालत आरक्षण द्या म्हटले तर देणार कुठून. कारण आरक्षणासाठी पन्नास टक्क्यांच्या मर्यादेची अट कायम आहे. ही अट कायम ठेवून या घटकांना आम्ही दिले, असे सांगणे ही शुद्ध फसवणूक आहे. उलट यामधून काहीही मिळणार नाही, असे शरद पवार यांनी म्हटले आहे. ते पत्रकार परिषदेत पक्षाची भूमिका मांडत होते.