मेहुण्यावर ईडीच्या छाप्यानंतर मातोश्रीचे दरवाजे हलतायत, भाजपची ठाकरेंवर टीका

नागपूर : श्रीधर पाटणकर यांच्या श्री साईबाबा गृहनिर्मिती प्रा.लि. कंपनीवर मंगळवारी (ता.२२) सक्तवसुली संचालनालयाने (ईडी) कारवाई केली. पाटणकर मुख्यमंत्री उद्धव ठाकरे यांचे मेहुणे आहेत. ईडीच्या कारवाईत कंपनीच्या मालकीच्या ठाण्यातील नीलांबरी प्रकल्पातील ११ सदनिकांवर टांच आणण्यात आली आहे. त्याची एकूण किंमत ६ कोटी ४५ लाखांची आहे. यावरुन राज्यात आरोप-प्रत्यारोपांचा खेळ सुरु झाला आहे. भाजपचे (BJP) नेते अनिल बोंडे यांनी ईडीच्या कारवाईवरुन मुख्यमंत्री उद्धव ठाकरे (Uddhav Thackeray) यांच्यावर टीका केली आहे. (BJP Leader Anil Bonde Criticize Uddhav Thackeray Over ED Raid)

मुख्यमंत्री ठाकरेंच्या मेहुण्यावरील ईडीच्या (Enforcement Directorate) छाप्यानंतर मातोश्रीचे दरवाजे, खिडक्या हलायला लागल्या आहेत. मंगळवारी ते स्वतः गाडी चालवत मातोश्रीवर गेले. आजही मोठ्या प्रमाणावर हालचाली सुरु आहे, की शिवसेना आमदारांना भोजनाला बोलावले आहे. एकूण पाहाता मुख्यमंत्री ठाकरेंची अस्वस्थता लपवून राहिलेली नसल्याची टीका बोंडे यांनी केली.

भ्रष्टाचारात अडकलेल्यांना नेहमी वाटते की उद्या कोणावर कारवाई होईल. महाविकास आघाडी सरकार (Mahavikas Aghadi Government) पाडण्याबाबत भाजपकडून तारखा दिल्या जातात. यावर बोंडे म्हणाले, सरकार केव्हा पडेल हे मला माहित नाही. ते कधी पडेल हे सांगायला मी ज्योतिषी नसल्याचे ते म्हणाले. जनता आता भाजपचे सरकार कधी येईल याची वाट पाहत असल्याचा दावा त्यांनी केला.