कर्ज बुडवल्याप्रकरणी मोहित कंबोज यांच्यावर गुन्हा दाखल

मागील काही दिवसांपासून मोहित कुंबोज यांचे नाव चर्चेत आहे. दरम्यान, आता एक मोठी बातमी समोर येत आहे. आर्थिक गुन्हे शाखा अर्थात EOW ने मुंबईत मोहित कंबोज यांच्यावर गुन्हा दाखल केला आहे. त्यांच्या कंपनीने तब्बल ५२ कोटी रुपयांचे कर्ज बुजवल्याप्रकरणी ही कारवाई करण्यात आली आहे. त्यामुळे आता राजकीय वर्तुळात चर्चांना उधाण आलं आहे.

मिळालेल्या माहितीनुसार, २०११ ते २०१५ या कालावधीत मोहित कंबोज यांच्या कंपनीने इंडियन ओव्हरसिज बँकेकडून ५२ कोटी रुपयांचे कर्ज घेतले होते. पण हे पैसे ज्या कारणासाठी घेतले होते, त्याऐवजी इतरत्र वळवण्यात आले. नंतरच्या काळात मोहित कंबोज यांच्या कंपनीने हे कर्ज बुडवले होते. त्यामुळे याप्रकरणी मोहित कंबोज आणि त्यांच्या कंपनीच्या दोन संचालकांविरोधात गुन्हा दाखल करण्यात आला आहे. त्यामुळे आता कारवाईचा वेग वाढण्याची शक्यता आहे. तर दुसरीकडे कंबोज यांच्याविरोधातील या गुन्ह्यामुळे हा भाजपासाठी मोठा धक्काही मानला जात आहे.

दरम्यान, काही दिवसांपूर्वी मोहित कंबोज यांच्यावर फसवणूक आणि कट रचल्याचा ठपका ठेवण्यात आला असून त्यांनी सर्व आरोप फेटाळून लावले आहेत. गेल्या काही काळात मोहित कंबोज यांनी नवाब मलिक आणि संजय राऊत यांच्यावर अनेक आरोप केले होते. किरीट सोमय्या यांच्या बरोबरीने कंबोज हे महाविकास आघाडीवर हल्ला चढवण्यात आघाडीवर होते. मध्यंतरी मोहित कंबोज यांनी हनुमान चालीसा वादातही उडी घेतली होती. यावेळी त्यांनी मशिदींसमोर लावण्यासाठी मोठ्याप्रमाणावर भोंग्यांचे वाटप केले होते.