आज भगवान गडावर दसरा मेळावा, पंकजा मुंडेंच्या निशाण्यावर कोण?

बीड : आज १५ ऑक्टोबरला दसऱ्यानिमित्त भगवान गडावर दसरा मेळाव्याचे आयोजन करण्यात आले आहे. तब्बल दोन वर्षानंतर हा दसरा मेळावा साजरा केला जातोय. तसेच गेल्या काही दिवसांपासून ओबीसी आरक्षणासंबंधी भाजप नेत्या पंकजा मुंडे (bjp leader pankaja munde) चांगल्याच आक्रमक झाल्या आहेत. त्यामुळे आज पंकजा मुंडे तोफ कोणावर धडाडणार? हे पाहणं महत्वाचं ठरणार आहे.

पंकजा मुंडे यांचा दसरा मेळावा भगवान गडावरील १२ एकर परिसरात पार पडत आहे. आज सकाळीच खासदार प्रितम मुंडे यांनी भगवान गडावर जाऊन दर्शन घेतले. तसेच गोपीनाथ मुंडे यांची नेहमीच आठवण येत असल्याचे त्या म्हणाल्या.

दरम्यान, भागवत कराड यांची केंद्रीय मंत्रिपदी वर्णी लागल्यानंतर पंकजा मुंडे आणि प्रितम मुंडे या नाराज असल्याचे बोलले जात होते. यावेळी त्यांनी पंतप्रधान मोदींची भेट देखील घेतली. तसेच पंकजा मुंडे यांचे समर्थक देखील नाराज होते. पण, त्यानंतर त्यांनी दुसरा मार्ग स्वीकारणार नाही, असे म्हटले. आता हेच भागवत कराड गोपीनाथ गडावर उपस्थित राहणार का? हा देखील मोठा प्रश्न आहे.