Maratha Reservation : अतिरेक झाला की उद्रेक होणारच, मराठा समाजाच्या सहनशीलतेचा अंत पाहू नका; उदयनराजेंचा सरकारला कडक इशारा

अंतरवाली सराटी : अन्य समाजाला न्याय मिळतो, मग मराठा समाजाला का मिळत नाही? इतर समाजाप्रमाणे मराठा समाजाला यापूर्वीच आरक्षण मिळायला पाहिजे होते. आरक्षणासाठी समाजाने शांततेच्या मार्गाने अनेक मोर्चे काढले; पण आता उद्रेक होत आहे. अतिरेक झाला, की उद्रेक होणारच. समाजाच्या सहनशीलतेचा अंत पाहू नका, असा इशारा खासदार उदयनराजे भोसले यांनी सरकारला दिला आहे.

जालना जिल्ह्यातील अंतरवाली सराटी येथे मराठा आंदोलकांवर (Jalna Maratha Reservation) शुक्रवारी पोलिसांनी लाठीहल्ला केला होता. या घटनेनंतर शनिवारी दुपारी खासदार उदयनराजे (Udayanraje Bhosale) यांनी गावात जाऊन उपोषणकर्ते मनोज जरांगे- पाटील यांची भेट घेतली. लाठीचार्जमध्ये जखमी आंदोलकांची विचारपूस केली.

दरम्यान, उदयनराजे व्यासपीठावर बसलेले असतानाच राष्ट्रवादी काँग्रेसचे अध्यक्ष खासदार शरद पवार यांचे आगमन झाले. आंदोलकांशी संवाद साधताना उदयनराजे म्हणाले, ‘‘मराठा समाजाने ५७ मोर्चे काढले. त्यावेळी कोणताही अनुचित प्रकार घडला नाही. मराठा समाज सहन करतो, म्हणून त्याची परीक्षा पाहावी, असा त्याचा अर्थ होत नाही. सर्व पक्षांनी विशिष्ट समाजाला घेऊन राजकारण केले; परंतु राज्यातील सर्वांत मोठ्या मराठा समाजाकडे दुर्लक्ष देखील केले.’’

सर्वपक्षीय नेत्यांनी एकत्र यावे

आंदोलक आणि मुख्यमंत्री, उपमुख्यमंत्री यांची लवकरच भेट घडवून आणली जाईल. मुख्यमंत्री, उपमुख्यमंत्री यांच्यासोबत चर्चा करून आंदोलनासंदर्भात तोडगा काढू, असे आश्वासन उदयनराजे भोसले यांनी दिले. मराठा समाजाच्या आरक्षणासाठी सर्वपक्षीय नेत्यांनी एकत्र येऊन सर्वोच्च न्यायालयात टिकेल, असे आरक्षण द्यावे, असे आवाहन उदयनराजे यांनी केले.

न्यायालयीन चौकशी सुरू करा

लाठीचार्जचा आदेश देणाऱ्या पोलिस अधिकाऱ्याचा निषेध करतो. याची चौकशी करून सर्वांना न्याय मिळाला. याप्रकरणी आंदोलकांवरील गुन्हे मागे घेण्याचे आवाहन करतो. याचा निश्चितपणे पाठपुरावा करू, असे आश्वासनही त्यांनी या वेळी दिले. लाठीचार्ज करणाऱ्या पोलिस अधिकाऱ्यांना निलंबित करण्यात यावे. जखमी रुग्णांच्या उपचाराची जबाबदारी सरकारने घ्यावे. लाठीचार्जबाबत न्यायालयीन चौकशी सुरू करावी, अशी मागणीही त्यांनी केली.