"शिवसेनेत आता फक्त दोनच माणसं राहणार"; दानवेंची घणाघाती टीका

मुंबई : एकनाथ शिंदे (Eknath Shinde) यांच्या बंडानंतर शिवसेनेत उभी फूट पडली आहे. दरम्यान आमदारानंतर आता खासदारांचाही शिवसेनेबद्दलचा असंतोष बाहेर येत असल्याचं चित्र पाहायला मिळत आहे. त्यानंतर शिवसेनेत आता फक्त शिवसेना पक्षप्रमुख उद्धव ठाकरे (Uddhav Thackeray) आणि आदित्य ठाकरे हे दोनच लोकं राहणार आहेत अशी बोचरी टीका भाजपचे केंद्रीय मंत्री रावसाहेब दानवे यांनी केली आहे.

(BJP Raosaheb Danve On Shivsena)

शिंदे यांनी बंड केल्यावर काही माजी खासदारांनीही शिवसेनेबद्दल नाराजी व्यक्त केली होती. तर शिवेसनेचे खासदार राहुल शेवाळे यांनी उद्धव ठाकरे यांना पत्र लिहित भाजपच्या राष्ट्रपतीपदाच्या उमेदवार द्रोपदी मुर्मू यांना मतदान करण्याची मागणी केली आहे. त्यानंतर शिवसेनेने आपल्या लोकसभेतील प्रतोदाची बदली करत भावना गवळी यांची उडलबांगडी केली आहे.

त्यामुळे शिवसेनेला आपल्या खासदारांवरही विश्वास नाही अशा चर्चांना उधाण आलं होतं. त्यातच शिवसेनेच्या १८ पैकी १२ खासदार आमच्या संपर्कात असून लवकरच ते शिंदे गटात येणार असल्याचा दावा गुलाबराव पाटलांनी केला आहे. त्यामुळे उद्धव ठाकरे यांनी भाजपला पाठिंबा द्यावा असं दानवे म्हणाले आहेत.

शिवसेनेची आणि आमची जुनी मैत्री होती, पण २०१९ मध्ये त्यांनी आम्हाला तिलांजली देत महाविकास आघाडी सरकार स्थापन केलं. पण शिवसेनेच्या लोकांची नाराजी आता बाहेर येऊ लागली आहे. त्यामुळे त्यांनी आमच्या राष्ट्रपती पदाच्या उमेदवार द्रौपदी मुर्मू यांना पाठिंबा द्यावा. आणि संजय राऊतांसारख्या पिलावळांना गप्प करावे अशा इशारा त्यांनी दिला आहे.

संजय राऊत दे काही बोलत आहेत ते त्यांनी न शोभण्यासारखं आहे. त्यांनीच शिवसेनेचे तुकडे तुकडे केले आहेत. पण आतातरी त्यांना गप्प करा आणि जेवढी राहिली तेवढी तरी शिवसेना टिकवण्याचा प्रयत्न करा. शिवसेनेता आता फक्त दोनच माणसं राहणार आहेत ते म्हणजे उद्धव ठाकरे आणि आदित्य ठाकरे. असा दावा दानवे यांनी केला आहे.

शिवसेनेला आपल्या खासदारांवर विश्वास नाही म्हणून त्यांनी भावना गवळी यांची प्रतोदपदावरून हकालपट्टी केली. त्यामुळे त्यांनी आता भाजपला पाठिंबा द्यावा असं भाजपचे रावसाहेब दानवे म्हणाले आहेत.