Budget Session : विरोधक आक्रमक होताच CM शिंदेंच्या मदतीला धावले फडणवीस, 'मविआ'ला दिलं ओपन चॅलेंज

राज्याचं अर्थसंकल्पीय विधिमंडळ अधिवेशन (Budget Legislature Session) सुरू आहे. कालपासून राज्याच्या अर्थसंकल्पीय विधिमंडळ अधिवेशनाला सुरवात झालीये.

सध्या कांद्याचे दर नीचांकी पातळीवर आले असून राज्य आणि केंद्र सरकारकडून उपाययोजना होत नसल्याने कांद्याचे दर रोजच घसरत आहेत. दर मिळत नसल्याने शेतकरी हवालदिल झाला असून महाविकास आघाडीच्या आमदारांनी हा मुद्दा उचलून धरत विधीमंडळाच्या पायऱ्यांवर आज (मंगळवार) जोरदार आंदोलन केलं.

गळ्यात कांद्याच्या माळा घालून हे आमदार पायऱ्यांवर आंदोलन करताना दिसले. ‘सरकार तुपाशी, शेतकरी उपाशी’, ‘मिळालाच पाहिजे…मिळालाच पाहिजे, शेतकऱ्याला भाव मिळालाच पाहिजे’ ‘गद्दार सरकार जोमात, शेतकरी मात्र कोमात’ अशा घोषणा या आमदारांनी दिल्या. या आंदोलनात दोन्ही सभागृहांचे विरोधी पक्षनेते अजित पवार आणि अंबादास दानवे सहभागी झाले होते.

दरम्यान, कांद्याच्या प्रश्नावर विरोध आक्रमक झाल्याचं पहायला मिळालं. सभागृहात कांद्याच्या दराविषयी प्रश्न उपस्थित करत काँग्रेस नेते नाना पटोले आणि राष्ट्रवादीचे आमदार छगन भुजबळ हे आक्रमक झाले. यावेळी त्यांना प्रत्युत्तर देताना मुख्यमंत्री एकनाथ शिंदे (Eknath Shinde) यांची दमछाक झाली. त्यानंतर उपमुख्यमंत्री देवेंद्र फडणवीस (Devendra Fadnavis) शिंदेंच्या मदतीला धावून आले.

फडणवीस म्हणाले, आपल्याला शेतकऱ्यांच्या प्रश्नावर मार्ग काढायचा आहे की, राजकारण करायचं आहे हे एकदा ठरवलं पाहिजे. मुख्यमंत्री सांगताहेत, कांद्याची नाफेड खरेदी सुरु केलीये. यांच्याकडं (मविआ) वेगळी माहिती असेल तर त्यांनी द्यावी, असं खुल आव्हान फडणवीसांनी महाविकास आघाडीला करत शिंदेंच्या मदतीला धावून गेले. दरम्यान, कांद्यावरुन सभागृहात गोंधळ पहायला मिळाला.