मुंबई : म्हाडाच्या (MHADA) रद्द झालेल्या परीक्षेची जबाबदारी आता टाटा कन्सल्टन्सी सर्व्हिसेस (TCS) वर सोपवण्यात आली आहे. त्याचबरोबर राज्यातील सर्व प्रकारच्या भरती परीक्षा या TCS, MKCL, IBPS या संस्थांमार्फत घेण्यात येणार आहेत. राज्य मंत्रीमंडळाच्या बैठकीत बुधवारी हा महत्वपूर्ण निर्णय घेण्यात आला. (Cabinet decision responsibility for planning MHADA exams on TCS)
राज्य मंत्रीमंडळाच्या बैठकीतील निर्णयानुसार, राज्यातील विविध शासकीय विभागांमार्फत होणाऱ्या परीक्षा यापुढे एमकेसीएल (महाराष्ट्र नॉलेज कॉर्पोरेशन लिमिटेड), आयबीपीएस (इन्स्टिट्युट ऑफ बँकिंग पर्सोनेल) किंवा टीसीएस (टाटा कन्सलटन्सी सर्व्हिसेस) यांच्या माध्यमातूनच घेण्यात येणार आहेत. महिन्याभरापूर्वी ज्येष्ठ नेते शरद पवार, मुख्यमंत्री उद्धव ठाकरे, गृहमंत्री दिलीप वळसे-पाटील, शिक्षणमंत्री वर्षा गायकवाड यांच्यामध्ये बैठक झाली होती, तेव्हाच परीक्षा घेण्यासाठी MKCLवर शिक्कामोर्तब झालं होतं. तर म्हाडाच्या परीक्षेबाबत काल एक बैठक झाली होती त्यामध्ये TCSचं नाव निश्चित झालं.
दरम्यान, फडणवीस सरकारच्या काळात शासकीय विभागांच्या भरतीच्या परीक्षा घेण्याची जबाबदारी विविध आयटी कंपन्यांवर सोपवली होती, त्यावरून नाराजी होती. यापार्श्वभूमीवर मुख्यमंत्री, शरद पवार, गृहमंत्र्यांची बैठक पार पडली होती.
आरोग्य भरती आणि म्हाडा भरतीच्या परीक्षेत गोंधळ
राज्यात गेल्या महिन्यात झालेल्या आरोग्य विभागाच्या 'क' आणि 'ड' गटाच्या परीक्षांचा पेपर फुटला होता. हा पेपर थेट आरोग्य संचालनालयातील एका बड्या अधिकाऱ्यानं फोडल्याचं तपासाअंती समोर आलं आहे. सहसंचालक महेश सत्यवान बोटले (मुंबई) यांच्यासह शिक्षक नामदेव विक्रम करांडे (बीड), उमेश वसंत मोहिते (उस्मानाबाद) आणि प्रकाश दिगंबर मिसाळ (मावळ) यांना नुकतीच अटक झाली आहे.
तसेच म्हाडाच्या विविध पदांसाठीच्या परीक्षांना ११ डिसेंबर २०२१ पासून सुरुवात होऊन पुढील काही दिवसांत पार पडणार होत्या. पण या परीक्षेसाठी पैशांचा व्यवहार झाल्याची माहिती पोलिसांकडून समोर येताच गृहनिर्माण मंत्री जितेंद्र आव्हाड यांनी परीक्षेच्या आदल्या दिवशी रात्री उशीरा व्हिडिओ ट्विट करत पुढे ढकलल्याची घोषणा केली होती.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.
