Cabinet Expansion: बंगले मिळाले पण खातं मिळेना, भाजपने शब्द फिरवला?; अजित पवार गटात अस्वस्थता

Cabinet Expansion: अजित पवार गट शिंदे-फडणवीस सरकारमध्ये सहभागी झाला. मात्र मंत्रिपदावरुन भाजप आणि पवारांमध्ये नाराजी असल्याची चर्चा आहे. आज अजित पवार - देवेंद्र फडणवीसांची सागर बंगल्यावर बैठक झाली. मात्र अजित पवार गट मंत्रिपदावर समाधानी नसल्याने मंत्रिमंडळ विस्तार रखडला आहे.

अजित पवार गटाला वाटाघाटीत ठरलेली खाती मिळत नसल्याने खातेवाटप रखडला आहे. भाजपने अजित पवार गटाला ज्या खात्यांबाबत आश्वासन दिले होते ती खाती मिळत नसल्याने युतीत अस्वस्थता असल्याची चर्चा राजकीय वर्तुळात रंगली आहे.

अजित पवार गटाला अर्थ, गृह, जलसंपदा ही खाती शिंदे गट आणि भाजप देण्यासाठी तयार नाही. याऐवजी महसूल किंवा ऊर्जा खाते देण्याची तयारी भाजपची असल्याचे सुत्रांनी सांगितले आहे.

सरकारी बंगल्यांचे वाटप-

नव्या मंत्र्यांना बंगले आणि दालनाचे वाटप झाले आहे. मात्र खातेवाटपावर अजून काहीच ठरलं नाही. राष्ट्रवादीला काही महत्त्वाची खाती हवी आहेत. रोज देवेंद्र फडणवीस आणि अजित पवार यांच्यात बैठका सुरू आहेत. आज रात्री देखील बैठक होण्याची शक्यता आहे. साम टीव्हीने याबाबत माहिती दिली आहे.