Shivsena: ठाकरेंचा दावा खरा! शिंदे गटाकडून थेट शिवसेनेच्या माजी खासदारावरच गुन्हा

सातारा: एकनाथ शिंदे यांच्यविरोधात केलेलं वक्तव्य शिवसेनेचे नेत चंद्रकांत खैरे यांना चांगलच भोवलं आहे, मुख्यमंत्री शिंदे याच्याबद्दल आक्षेपार्ह वक्तव्य केल्याप्रकरणी चंद्रकांत खैरे यांच्याविरोधात सातारा येथे गुन्हा दाखल करण्यात आला आहे. काही वेळापूर्वी माजी मुख्यमंत्री उद्धव ठाकरे यांनी शिवसैनिकांवर दाबाव आणण्याकारिता गुन्हे दाखल केले जात असल्याचा दावा केल्यानंतर खैरे यांच्यावर गुन्हा दाखल करण्यात आला आहे.

सत्ता संघर्षात आता शिंदे गटाकडून आक्रमक भूमिका घेतली जात असून मुख्यमंत्र्याविरोधात आक्षेपार्ह विधान केल्याबद्दल सातारा पोलिस ठाण्यात खैरेंविरोधात हा गुन्हा दाखल करण्यात आला आहे. खैरे यांनी वेळोवेळा शिंदे याच्यावर अत्यंत तिखट शब्दात टीका केली होती, दरम्यान एकनाथ शिंदे यांचे डावपेच बऱ्याच दिवसांपासून चालले होते. आनंद दिघे असते तर त्यांना उलटं टांगलं असतं. ते गेल्यानंतर यांच्यात काय काय सुटलं हे राजन विचारे यांना किंवा तेथील शिवसैनिकांना विचारा असं खैरे म्हणाले होते, त्यांच्या या विधानानंतर हा गुन्हा दाखल झाला आहे. शिंदे गटाचे राजेंद्र जंजाळ यांच्या तक्ररीनंतर हा गुन्हा दाखल करण्यात आला आहे.

दरम्यान निवडणूक आयोगाने शिवेसना नाव आणि पक्षचिन्ह गोठवल्यानंतर फेसबुकच्या माध्यमातून बोलतांना उद्धव ठाकरे यांनी शिवसेनेला पर्यायी नावं आणि चिन्हंदेखील दाखवून दिले. त्रिशुळ, उगवता सूर्य आणि धगधगती मशाल या चिन्हांचे फोटो उद्धव ठाकरेंनी दाखवले. शिवाय नावांमध्ये शिवसेना बाळासाहेब ठाकरे, शिवसेना बाळासाहेब प्रबोधनकार ठाकरे आणि शिवसेना उद्धव बाळासाहेब ठाकरे ही पर्यायी नावं निवडणूक आयोगाला दिल्याचं उद्धव ठाकरेंनी सांगितलं.

मी डगमगणारा नाही, लढणारा आहे. असं म्हणत अंधेरी पूर्व पोटनिवडणुकीमध्ये ताकदीने लढणार असल्याचं उद्धव ठाकरे यांनी सांगितलं. त्यांनी निवडणूक आयोगाला आवाहन करत आमचं नाव आणि चिन्हं आम्हाला तातडीने द्या, असं सांगितलं.