Weather Update: दिवाळीवर असलेले पावसाचे सावट दूर; थंडी पुन्हा परतणार

दिवाळीच्या उत्तरार्धात कडाक्याची थंडी पडण्याची शक्यता आहे. पुढील दोन दिवसांत थंडी पुन्हा परतणार आहे. पुढील आठवडाभर तरी आकाश मुख्यतः निरभ्र राहून, सकाळी धुके पडण्याची शक्यता हवामान खात्याने वर्तवली आहे. दिवाळी सणावर असलेले पावसाचे सावट दूर झाले आहे. नोव्हेंबरच्या उत्तरार्धात मात्र पावसाची शक्यता नसल्याचे हवामान तज्ज्ञांनी स्पष्ट केले आहे. ढगाळ आकाशामुळे राज्याच्या तापमानात चढ-उतार सुरू आहे.

शहरासह संपूर्ण जिल्ह्यातच ढगाळ हवामान निवळले असून, पुढील दोन दिवसांत थंडी पुन्हा परतणार आहे. पुढील आठवडाभर तरी आकाश मुख्यतः निरभ्र राहून, सकाळी धुके पडण्याची शक्यता हवामान खात्याने वर्तवली आहे. त्यामुळे दिवाळी सणावर असलेले पावसाचे सावट दूर झाले आहे.

काल (शनिवारी) सकाळपासूनच आकाश निरभ्र होते. दुपारच्या कमाल तापमानातही बऱ्यापैकी घट झाल्याचे पाहायला मिळाले. त्यामुळे दिवाळीच्या उत्तरार्धात कडाक्याची थंडी पडण्याची शक्यता आहे. पुणे जिल्ह्यात जरी वातावरण कोरडे असले तरी कोकणात काही ठिकाणी ढगाळ वातावरणासह तुरळक ठिकाणी किरकोळ पावसाची शक्यता वर्तविण्यात आली आहे. नोव्हेंबरच्या उत्तरार्धात मात्र पावसाची शक्यता नसल्याचे हवामान तज्ज्ञांनी स्पष्ट केले. त्यामुळे या काळात थंडीमध्ये वाढ होईल.

राज्यात आज (रविवारी) ढगाळ हवामानासह तापमानात चढ-उतार होण्याची शक्यता आहे. राज्यात मुख्यतः कोरड्या हवामानाचा अंदाज आहे. राज्यात गारठा कमी झाला असून, गुलाबी थंडीची प्रतीक्षा आहे. पश्चिम-मध्य अरबी समुद्रात चक्राकार वाऱ्यांची स्थिती कायम आहे. बंगालच्या उपसागरात मंगळवारपर्यंत (ता. १४) कमी दाबाचे क्षेत्र तयार होण्याचे संकेत आहेत. पश्चिमेकडे सरकताना या प्रणालीची तीव्रता वाढेल. ढगाळ आकाशामुळे राज्याच्या तापमानात चढ-उतार सुरू आहे.