चांदिवाल आयोगानं अनिल देशमुखांना ठोठावला ५० हजारांचा दंड!

मुंबई : माजी गृहमंत्री अनिल देशमुख (Maharashtra Former Home Minister Anil Deshmukh) यांच्या वकिलाकडून सचिन वाझेची उलटतपासणी सुरू आहे. मात्र, आज देशमुखांचे वकील उलटतपासणीसाठी आयोगासमोर उपस्थित नव्हते. त्यामुळे आयोगाने देशमुखांना ५० हजार रुपयांचा दंड (Chandiwal Commission Fine On Anil Deshmukh) ठोठावला असून हा दंड मुख्यमंत्री सहायत्ता निधीमध्ये जमा करण्याचे आदेश दिले आहेत.

पोलिसांच्या मदतीने खंडणीचं रॅकेट चालवत असल्याच्या गंभीर आरोपांची चौकशी करण्यासाठी चांदिवाल आयोगाची स्थापना राज्य सरकारने केली आहे. तसेच मुंबई पोलिसांनी बडतर्फ केलेल्या सचिन वाझेला एनआयएने अटक केली होती. त्यानंतर वाझेला मुंबई पोलिसांच्या ताब्यात दिलं आहे. देशमुखांच्या वकिलांनी वाझेची उलटतपासणी करण्याची परवानगी मागितली होती. विशेष न्यायालयाने देशमुखांच्या वकिलांना ही परवानगी दिली होती. त्यासोबतच देशमुखांना चांदिवाल आयोगासमोर हजर राहण्याचीही परवानगी दिली होती. आतापर्यंत दोनवेळा अनिल देशमुखांच्या वकिलांनी वाझेची उलटतपासणी केली आहे. यापूर्वी १४ डिसेंबरला सुनावणी घेण्यात आली होती. त्यावेळी वाझेनी दिलेल्या उत्तराने खळबळ निर्माण झाली होती. अनिल देशमुखांनी पैसे उकळण्यास सांगितले का? असा प्रश्न वाझेला विचारण्यात आला होता. तेव्हा त्याने नाही, असं उत्तर दिलं होतं. त्यामुळे या प्रकरणात आणखी एक नवीन ट्विस्ट आलं होतं.

देशमुखांच्या वकिलांकडून आज पुन्हा वाझेची उलटतपासणी करण्यात येणार होती. मात्र, आज देशमुखांचे वकील आयोगासमोर हजर झाले नाही. त्यामुळे सुनावणी २२ डिसेंबरला साडेबाराला घेण्यात येणार आहे. तसेच आयोगाने देशमुखांना ५० हजार रुपयांचे दंड ठोठावला असून तो दंड मुख्यमंत्री सहायत्ता निधीमध्ये जमा करण्याचे आदेश दिले आहेत. यापूर्वी देखील आयोगाने देशमुखांना १५ हजार रुपयांचा दंड आयोगाने ठोठावला होता.