शिवसेना तुमच्यापासून अंतर का राखतेय, हिशोब लावून आम्हालाही कळवा - चंद्रकांत पाटील

मुंबई: शिवसेना नेते, खासदार संजय राऊत (Sanjay raut) हे पत्रकार परिषद घेऊन भाजपवर निशाणा साधत आहेत. यावर आता भाजप नेत्यांनीही कंबर कसली आहे. भाजपचे प्रदेशाध्यक्ष चंद्रकांत पाटील (Chandrakant Patil) हे कालपासून कोल्हापुरात (Kolhapur) आहेत. त्यांनी संजय राऊत यांच्यावर आरोपाच्या फैरी झाडण्यास सुरुवात केली आहे. शिवसेना (Shivsena) तुमच्यापासून अंतर का राखतेय याचा हिशोब लावून आम्हालाही कळवा असा निशाणा राऊतांच्यावर लगावला आहे. त्यांनी ट्विट करत घणाघात केला आहे.

ते म्हणतात, विश्वप्रवक्ते संजय राऊत स्वत:ला तपास यंत्रणा आणि न्यायाधीश समजत आहेत. किरीट सोमय्यांवर (Kirit Somaiya) जे आरोप त्यांनी केलेत त्याचा तपास-हिशोबही तेच करत आहेत. सोमय्यांची धिंड काढतील असा निर्णयही लावून मोकळे झाले आहेत. तुम्ही सर्वज्ञ असाल, पण यंत्रणांना काम करण्याची जरा संधी तरी द्या? असा मिश्किल शालूजोडा हाणला आहे.

माझीही धिंड निघेल त्यामुळे बाजूला राहा, असा सल्ला देताय की ही तुमची पोकळ दमबाजी? किरीट सोमय्या यांच्या पासून किती अंतर राखावं याचा हिशोब आम्ही आमच्या पद्धतीनं करणार आहोतच, याची काळजी करू नका. मात्र आता या सगळ्यात शिवसेना तुमच्यापासून अंतर का राखते आहे, याचा हिशोब लावा आणि आम्हालाही जरा याचे उत्तर कळवा असेही ते म्हणाले.