जेलमध्ये सोपं असतं…आजारी माणसाकडे बघायचं नाही अन् विषय संपला

जळगाव : आज (ता.२५) ओबीसी परिषदेत बोलताना राज्याचे अन्न व नागरी पुरवठा मंत्री आणि ओबीसी नेते छगन भुजबळ (Chhagan Bhujbal) यांनी खोचक शब्दांत तुफान टोलेबाजी केली. यावेळी भुजबळ यांनी ते तुरुंगात असतानाच्या आठवणीही ताज्या केल्या. यावेळी तुरूंगात त्यांचा जीव कसा वाचवला, याविषयी ते बोलले. यावेळी छगन भुजबळ यांनी तुफान टोलेबाजी केली. त्यामुळे सभागृहात एकच हशा पिकला होता.

कपिल पाटील यांनी कसा वाचविला जीव? तुरुंगात घालवलेल्या दिवसांची आठवण

छगन भुजबळ यांनी तुरुंगात असताना आमदार कपिल पाटील (kapil patil) यांनी आपला जीव कसा वाचवला, याविषयी ते बोलले. “कपिल पाटील यांनी माझा जीव वाचवला. जेलमध्ये जेव्हा मला टाकलं तेव्हा एकदा फार गंभीर प्रकृती झाली होती. तिथे सोपी गोष्ट असते. कुणाातरी जेलमध्ये टाकायचं. तो आजारी पडला की त्याच्याकडे बघायचं नाही आणि एक दिवस गेल्यावर म्हणायचं की हार्ट अटॅकने गेला. संपला विषय. पण जेव्हा कळलं की भुजबळ एकदम सीरियस आहेत, तेव्हा हे कपिल पाटील विधानमंडळात उभे राहिले. म्हणाले, तुम्ही काय वागणूक देत आहात त्यांना. हॉस्पिटलमध्ये नेत नाहीत, नीट काळजी घेत नाहीत. तिथे मारून टाकणार की काय तुम्ही? नंतर शरद पवारांनी पत्रच पाठवलं, की भुजबळांना काही झालं, तर हे सरकार जबाबदार राहील. सुदैवाने मी बाहेर आलो”, असं भुजबळ म्हणाले.

जे घाबरले असतील, त्यांनी भाजपात जावं

जे घाबरले असतील, त्यांनी ताबडतोब भाजपामध्ये जायचं. मग तुम्हाला सगळं माफ. खरं तेच सांगतोय”, असं भुजबळ म्हणाले. आपल्या बोलण्यामुळे जे घाबरले असतील, त्यांनी भाजपात जावं, असा सल्ला त्यांनी दिला. “हे सगळं असं होत असल्यामुळे त्यांच्या विरुद्ध आपण जेव्हा एखादी भूमिका मांडतो, तेव्हा सावध राहा सगळे.

ओबीसी मंत्र्यांवर निशाणा

ओबीसी मंत्री देखील खूप आहेत. मी कुणावर वैयक्तिक टीका करणार नाही. पण बोलणारे फार थोडे आहेत”, असा टोला भुजबळांनी यावेळी लगावला.दरम्यान, राज्यातील ओबीसी मंत्र्यांवर देखील छगन भुजबळांनी अप्रत्यक्ष निशाणा साधला. “आत्ताच हे गुलाबराव पाटील बोलले. मंत्रिमंडळात देखील ते माझ्या पाठिशी ओबीसीच्या मुद्द्यावर बोलतात, त्याबद्दल त्यांचे आभार.