हॉटेल्स, दुकानं खुली ठेवण्याची वेळ वाढवणार? आज महत्त्वाची बैठक

मुंबई: मुंबईसह (Mumbai) राज्यात आता बऱ्यापैकी कोरोनाची साथ (corona virus) नियंत्रणात आली आहे. रुग्णांची संख्या कमी होत असतानाच मृत्यूचे प्रमाणही कमी झाले आहे. काल मुंबईत पहिल्यांदाच कोरोनामुळे एकाही मृत्यूची नोंद झालेली नाही. कोरोना व्हायरसची साथ सुरु झाल्यानंतर हे पहिल्यांदाच असं घडलं आहे. हे एक चांगलं लक्षण आहे. मुंबईत कोरोना बाधित होण्याचा दर 1.27% वर आला असून, रुग्ण बरे होण्याचा दर 97 टक्क्यांवर आला आहे. मुंबईसाठी ही एक चांगली बातमी आहे.

आज मुख्यमंत्री उद्धव ठाकरे यांची कोविड टास्क फोर्स सोबत महत्त्वाची बैठक होणार आहे. निर्बंध शिथील होण्याच्या दृष्टीने ही अत्यंत महत्त्वाची बैठक आहे. दिवाळीआधी आणखी काही निर्बंध शिथील होऊ शकतात. राज्यात आता शाळा, सार्वजनिक वाहतुकीसह बऱ्याच गोष्टी सुरु झाल्या आहेत. पण वेळेच्या बाबतीत अजूनही काही मर्याद आहेत. हॉटेल, दुकानांना वेळेची मर्यादा पाळावी लागत आहे.

दिवाळीचा सण जवळ येत आहे. त्यामुळे हॉटेल, दुकानं खुली ठेवण्याची वेळ वाढवणार? तसंच कोरोना प्रतिबंधक लसीचा एक डोस घेतलेल्यांना सवलती मिळणार? याकडे सगळ्यांचे लक्ष आहे. सध्या दुकानांना रात्री नऊ आणि हॉटेल्सना रात्री १० वाजेपर्यंत परवानगी आहे. दिवाळीमध्ये अर्थकारणाला मोठी चालना मिळते.

कोरोनाच्या दुसऱ्या लाटेमध्ये लॉकडाउनमुळे दुकानदार, व्यावसायिकांचे नुकसान झालं आहे. हॉटेल्स, दुकानांना वेळ वाढवून दिल्यास हे नुकसान काही प्रमाणात भरुन येऊ शकते. त्यामुळे आजच्या बैठकीत निर्बंध आणखी शिथिल करण्याचा निर्णय होणार? याकडे लक्ष असेल.